Սույն թվականի հուլիսի 16-ին,Վրաստանի Ծերովանի բնակավայրում, «Երիտասարդ առաջնորդների վերապատրաստման ծրագրի» շրջանակներում, մեկնարկեց քառօրյա ճամբարը: Ճամբարում անցկացրած օրերի ընթացքում Վրաստանի հայաբնակ շրջաններից և գյուղերից ժամանած թվով 36 երիտասարդներ կանցնեն երիտասարդ համայնքային առաջնորդների վերապատրաստման դասընթաց: Նրանք դասախոսություններ կլսեն հայ ժողովրդի և եկեղեցու պատմության, Թբիլիսիի հայկական պատմա-մշակութային կոթողների, ազգային և կրոնական փոքրամասնությունների իրավունքների, քաղաքացիական հասարակության և տեղական ինքնակառավարման թեմաներով: Կանցնեն տեղերում մշակութային կյանքը զարգացնելու վարժանքներ:

Հուլիսի 14-ին, արդեն 29-րդ անգամ, հայ աշուղական արվեստի կարկառուն դեմք Ջիվանու (Սերոբ Ստեփանի Լևոնյան) ավանդական մեծարման օրը նրա երգարվեստի սիրահարները հավաքվել էին աշուղի ծննդավայրում՝ Ախալքալաքի շրջանի Կարծախ գյուղում: Տոնական օրն սկսվեց մեկ տարի առաջ վերանորոգված և վերաօծված Կարծախ գյուղի 1830-ական թվականների կառույց Սուրբ Հովհաննես-Կարապետ եկեղեցում մատուցված Սուրբ Պատարագով: Պատարագիչն էր համայնքի հոգևոր հովիվ Տեր Տիգրան քահանա Մխիթարյանը: Հավարտ Սուրբ Պատարագի՝ հավատացյալներին շնորհավորական քարոզով օրվա խորհրդի խոսք հղեց Սամցխե-Ջավախքի և Ծալկայի ընդհանուր առաջնորդական փոխանորդ Տեր Բաբգէն աբեղա Սալբիյանը: Պատարագի Սրբազան վերջավորությանը նաև կատարվեց հոգեհանգստյան արարողություն ի հիշատակ մեծահամբավ Ջիվանու: Այնուհետև հոգևոր դասը տեղի իշխանության ներկայացուցիչների հետ միասին այցելեց գյուղի կենտրոնում տեղադրված Մեծն Ջիվանու արձանին և վարդեր դրեցին հրապարակախոս ու փիլիսոփա, բարոյագետ ու երգաստեղծ աշուղ Ջիվանու հուշարձանին:

Հայ Առաքելական Ուղղափառ Սուրբ Եկեղեցու օրացույցով, հուլիսի 7-ին նշվեց Տեր Հիսուս Քրիստոսի Պայծառակերպության՝ Վարդավառի տոնը: Վիրահայոց Թեմի հավատացյալները, Թբիլիսիի «Սուրբ Էջմիածին» եկեղեցու հոգևոր հովիվ Տեր Սամվել քահանա Թորոսյանի նախաձեռնությամբ , այդ օրը նշանավորեցին ուխտագնացությամբ դեպի Հայաստանի Հանրապետության Ղալթախչիի «Սուրբ Հովհաննես» զորավոր մատուռը:

Հուլիսի 7-ին, Վիրահայոց Թեմի «Հայարտուն» կենտրոնում, կայացավ Վրաստանի հայ գրողների «Վերնատուն» միության համանուն տարեգրքի շնորհանդեսը: Վիրահայ ստեղծագործողներին համախմբող այս կառույցը շուրջ տասը տարի առաջ ստեղծել է իր տարեգիրքը, որի շրջանակներում յուրաքանչյուր երկամյակը մեկ, հայերեն, ռուսերեն, այս տարի արդեն նաև վրացերեն, հրապարակվում են միության անդամների և ոչ միայն նրանց, գործերը և թարգմանությունները: