Հուլիսի 28-ին, Նինոծմինդայի շրջանի Գանձա գյուղում նշվեց տերյանական պոեզիայի ավանդական օրը:Եվ վերստին, արդեն 46-րդ անգամ, Գանձայում էին հավաքվել տերյանական պոեզիայի երկրպագուներն ու գնահատողները,իրենց սերն ու խոնարհումը բերելով հայրենիք, եղբայրություն և հավասարություն երգող բանաստեղծի տաղանդի և պոեզիայի առջև: Ջավախքի չքնաղ ծոցում ծնված սիրո, ազատության, հավասարության և եղբայրության ջատագով բանաստեղծ Վահան Տերյանը (Վահան Սուքիասի Տեր-Գրիգորյան) անսահման սիրով եղել է կապված իր ծննդավայր Գանձա գյուղի հետ,թախծել ու կարոտել հայրենի եզերքին:

Թբիլիսիի մի շարք հայկական ոչկառավարական կազմակերպություններ, արձագանքելով ծանր կացության մեջ գտնվող սիրիահայ մեր եղբայրներին և քույրերին օգնություն ցուցաբերելու Ամենայն Հայոց կաթողիկոս Գարեգին Երկրորդի կոչին, կազմակերպեցին տարբեր միջոցառումներ, որտեղից գոյացած գումարը պետք է օգտագործվեր սիրիահայերին օգնության նպատակով: Բարեգործական գործողությանը իրենց մասնակցությունը բերեցին նաև Վրաստանում ՀՀ դեսպանությունը, Վիրահայոց Թեմի «Հայարտուն» կենտրոնը, Դավթյան տիկնիկային մշակույթի տունը, "Armenian Art Hall» էլեկտրոնային ամսագիրը, «Վրաստանի հայ համայնք» հասարակական կազմակերպությունը, «Պանհայկական խաղերի» միջազգային ասոցիացիայի Վրաստանի մասնաճյուղը, Թեմի հոգևոր դասը, գործարարներ, մշակույթի և արվեստի գործիչներ, թբիլիսահայ համայնքի անդամներ: Հանգանակված գումարը՝ 5000 ամերիկյան դոլարը, Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությամբ և միջնորդությամբ, փոխանցվեց Մայր Աթոռ Սուրբ Էջմիածին:

Հուլիսի 19-ին, Վիրահայոց թեմի «Հայարտուն» կենտրոնում կայացավ բանասեր, Վրաստանի վաստակավոր լրագրող Արսեն Երեմյանի «Կանչիր ինձ՝ ինչպես որդուդ» ժողովածուի շնորհանդեսը: Միջոցառումը նախաձեռնել էին «Ռուսական ակումբ» (տնօրեն՝ Ռուսաստանի Դաշնության վաստակավոր գործիչ Նիկոլայ Սվենտիցկի) միջազգային կրթա-մշակութային միությունը և Վիրահայոց թեմի «Հայարտուն» կենտրոնը: Շնորհանդեսին ներկա էին Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը, Վրաստանի նախագահի խորհրդական Վան Բայբուրթյանը, ակադեմիկոս Թենգիզ Ուչանեիշվիլին, պրոֆեսոր Գիզո Ուրուշաձեն, վրացական հանրային հեռուստատեսության վետերան Իգոր Նագորնին, գրականության, արվեստի և մշակույթի գործիչներ, ընթերցասեր հասարակայնության ներկայացուցիչներ:

Հուլիսի 19-ին ավարտվեց Վրաստանի հայ համայնքի երիտասարդ առաջնորդների վերապատրաստման ծրագիրը: Այն նախաձեռնել էր Վիրահայոց Թեմի «Հայարտուն» կենտրոնի երիտասարդական բաժինը՝ (կենտրոնի հոգևոր տեսուչ՝ Գևորգ սարկավագ Անտոնյան) ՀՀ Սպորտի և երիտասարդության հարցերով նախարարության, ՀՀ Սփյուռքի նախարարության և Գալուստ Գյուլբենկյան հիմնադրամի ֆինանսական աջակցությամբ: Ծրագրին մասնակցում էին 32 երիտասարդներ մայրաքաղաքից և Վրաստանի տարբեր տարածաշրջաններից: Անդրկովկասում՝ Կաթոլիկական Եկեղեցու առաքելության կառավարիչ Գերաշնորհ Ջյուզեպպե եպիսկոպոս Պազոտտոյի օրհնությամբ, Ծրագիրն իրականացվեց Կաթոլիկական Եկեղեցու համալիրում՝ Ծերովանի քաղաքամերձ ավանում: