Ամեն տարի Աջարիայի հայ երիտասարդներն ավանդության համաձայն մասնակցում են ՀՀ Սփյուռքի նախարարության «Արի տուն» ծրագրին: Նրանք մեկնում են Մայր հայրենիք, ծանոթանում տեսարժան վայրերին, ապրում հայ ընտանիքներում, մտերմանում աշխարհասփյուռ հայության իրենց հասակակիցների հետ: 2013թ հուլիսի 6-ի գիշերը Երևան մեկնող երիտասարդները Բաթումի «Սուրբ Փրկիչ» եկեղեցում մասնակցեցին խոկման կարգին: Նրանք Տեր Արարատ քահանա Գումբալյանի կողմից ստացան օրհնություն: Վերջինս երիտասարդներին հորդորեց Մայր հայրենիքում զգալ ոչ թե որպես պարզ զբոսաշրջիկներ, այլ իբրև ուխտավորներ:

Հուլիսի 5-6-ին ՀՀ ԳԱԱ նախագահության նիստերի դահլիճում տեղի ունեցավ ՀՀ սփյուռքի նախարարության և Իրավաբանների համահայկական խորհրդաժողովի կողմից կազմակերպված իրավաբանների համահայկական երկրորդ համաժողովը, որին մասնակցում էին 100 անվանի իրավաբաններ Հայաստանից, Սփյուռքից և Արցախից: Համաժողովին մասնակցում էր նաև Վիրահայոց Թեմի առաջնորդի խորհրդական և Թեմի իրավաբանական բաժնի պատասխանատու Լևոն Իսախանյանը:

Այս տարի հուլիսի 7-ին Հայ Առաքելական Եկեղեցին տոնեց Վարդավառի տոնը: Տոնի առիթով Ախալցխայի արհեստական լճի ամֆիթատրոնում տեղի ունեցավ շքեղ համերգ՝ նվիրված Վարդավառի տոնին, որին իրենց մասնակցությունն էին բերել նաև տարբեր շրջանների և Վիրահայոց թեմի «Հայարտուն» կենտրոնի պարային համույթները: Նախքան համերգային ծրագրի սկսվելը, Ախալցխայի «Սբ. Գրիգոր Լուսավորիչ» եկեղեցում Վարդավառի առիթով տեղի ունեցավ տոնական պատարագ, որի ավարտին երիտասարդները եկեղեցու բակում կազմակերպեցին ավանդական ջրոցի:

Հուլիսի 9-ին Երևանի Հակոբ Պարոնյանի անվան երաժշտական կոմեդիայի պետական թատրոնի դալիճում կայացավ ՀՀ սփյուռքի նախարարության` Սփյուռքի երիտասարդների՝ Հայաստան ճանաչողական այցելությունների «Արի տուն» ծրագրի երրորդ փուլի բացման հանդիսավոր արարողությունը:Այս փուլին մասնակցում է շուրջ 170 պատանի և աղջիկ Ռուսաստանից, Ռումինիայից, Ֆրանսիայից, Գերմանիայից, Ուկրաինայից, ԱՄՆ-ից, Վրաստանից, Իսրայելից և Բելառուսից: