2014 թվականի հունվարի 20-ը Վրաստանի հայ համայնքի կյանքում գրանցվեց որպես «Արձագանք» հայալեզու թերթի ծննդյան օր: Այդ օրը ընթերցողին մատուցվեց համայնքային տեղեկատվական թերթի առաջին համարը, որը կոչված է լայն հասարակության համար դառնալու համայնքային կյանքի տպագիր մարմինը: Թերթի այս համարում զետեղված նյութերը Վրաստանում հայ համայնքի շարժընթացի վկայություններն են: «Արձագանք» թերթի առաքելությունն է դառնալ հայ համայնքի կյանքի հայելին, լայն զանգվածներին հաղորդակից դարձնել հայ հոգևոր կյանքին և միջկրոնական հարաբերությունների առօրյային, արտացոլել Վրաստանի քաղաքական և հասարակական կյանքի բոլոր տեղաշարժերը, պատմել Վրաստանի հայ համայնքի պատմական դերի, հայ-վրացական հարաբերությունների տարբեր տեսանկյունների, հայ Սփյուռքի նորությունների, հայ մարդու առաջընթացի և խնդիրների մասին:

Հունվարի 18-ին, Վրաստանի հայ կանանց «Շուշանիկ» միության նախաձեռնությամբ, «Գարի Դավթյան» տիկնիկային մշակույթի տանը կայացավ հանդիպում Վրաստանի Կանանց խորհրդի անդամների հետ: Հանդիպումը նվիրված էր վերոհիշյալ կազմակերպության 65-ամյակին: Հանդիպմանը ներկա էին Վրաստանի Կանանց խորհրդի նախագահ ակադեմիկոս Մզեքալա Շանիձեն, փոխնախագահ Քեթևան Գաբրուաշվիլին,Աբխազիայի կանանց միության նախագահ Ռոզա Կուխալաշվիլին, խորհրդի այլ անդամներ, ինչպես նաև Վրաստանի Ռուսական համայնքից՝ Ալլա Բեժենցեվան, ուկրաինական համայնքից՝ Վալենտինա Մարջանիշվիլին, քրդական համայնքից՝ Լիլի Սաֆարովան: Մշակույթի տանը հյուրերին դիմավորեցին «Գարի Դավթյան» տիկնիկային մշակույթի տան տիրուհի Ժաննա Դավթյանը՝ դստեր հետ, Վրաստանի հայ կանանց «Շուշանիկ» միության անդամները:

Հունվարի 6-ին՝ մեր Տեր և Փրկիչ Հիսուս Քրիստոսի Սուրբ Ծննդյան և Աստվածահայտնության տոնին, Ջավախքի գործող բոլոր եկեղեցիներում մատուցվեց Սուրբ և Անմահ Պատարագ:

Ախալքալաքի Սբ. Խաչ Եկեղեցում պատարագիչը Ջավախքի ընդհանուր առաջնորդական փոխանորդ Տեր Բաբգէն վրդ. Սալբիյանն էր:

Մեր Տեր Հիսուս Քրիստոսի Ծննդյան և Աստվածհայտնության այս ավետիսը հունվար 5–ի Ճրագալույցի և հունվար 6–ի Սուրբ Ծննդյան պատարագների ժամանակ հնչեց Հայ Առաքելական Ուղղափառ Սուրբ Եկեղեցու բոլոր խորաններից: Բաթումիի «Սուրբ Փրկիչ» եկեղեցում տոնական Սուրբ Պատարագները մատուցեց Աջարիայի,Գուրիայի և Իմերեթիի հայության հոգևոր հովիվ Տեր Արարատ քահանա Գումբալյանը: