Վրաստանի հայ երաժիշտների միության նախաձեռնությամբ և Վիրահայոց թեմի «Հայարտուն» կենտրոնի աջակցությամբ, հունվարի 11-ին կենտրոնի Գալուստ Գյուլբենկյան սրահում կայացավ կիթառի երեկո: Խորհրդանշորեն այն նվիրվեց ճանաչված երաժիշտ-մանկավարժ, կիթառահար Թենգիզ Գամիդաձեի բեմական գործունեության 50-ամյակին:

Հունվարի 9-ին աշխարհահռչակ կինոռեժիսոր Սերգեյ Փարաջանովը կդառնար 90 տարեկան: Ազգությամբ հայ, Թբիլիսիում ծնված, ստեղծագործական արգասաբեր տարիները այստեղ և Ուկրաինայում անցկացրած և Երևանում հուղարկավորված Սերգեյ Փարաջանովի հոբելյանին էր նվիրված հուշ-երեկոն, որը նախաձեռնել էր Վիրահայոց թեմի «Հայարտուն» կենտրոնը՝ ճանաչված լուսանկարիչ Յուրի Մեչիտովի հետ համագործակցությամբ և ՀՀ Մշակույթի նախարարության աջակցությամբ:

Մոտեցող Սուրբ Ծննդյան սքանչելի տոնի կապակցությամբ Թբիլիսիի թիվ 104 հանրային դպրոցի (տնօրեն՝ Իրինա Ժամկոչյան) առաջինից հինգերորդ դասարանների աշակերտների ուժերով, դպրոցի գրադարանավարուհի Հասմիկ Անտոնյանի նախաձեռնությամբ կազմակերպվեց Հիսուս Քրիստոսի ծնունդը ներկայացումը: Մասնակից խումբը մանրակրկիտ պատրաստվեց և սիրով այն ներկայացրեց դպրոցական միջոցառման ժամանակ, որին ներկա էին նաև Սբ. Էջմիածին եկեղեցու քահանա Տեր Մանուկ Զեյնալյանը և Վիրահայոց թեմի կրթական բաժնի տնօրեն Եվգենյա Մարկոսյանը:

Հունվարի 6-ի առավոտից տոնական տրամադրությունն էր իշխում Թբիլիսիի Սուրբ Էջմիածին եկեղեցում: Սուրբ Ծննդյան և Աստվածհայտնության տոնի կապակցությամբ, Թբիլիսիի Սուրբ Էջմիածին եկեղեցում մատուցվեց Սուրբ Պատարագ: Պատարագիչն էր Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը: