6 აპრილს თბილისის „სურბ ეჯმიაწინ“ ეკლესიაში გადაიხადეს სირიის ომში დაღუპულთა სულის მოსახსენიებელი პანაშვიდი. სამგლოვიარო ცერემონიას ესწრებოდა საქართველოს სომეხთა ეპარქიის წინამძღვარი ეპისკოპოსი ვაზგენ მირზახანიანი.

საქართველოს სომეხთა ეპარქიის „ჰაიარტუნ“ ცენტრის გალუსტ გიულბენკიანის სახელობის დარბაზში 5 აპრილს გაიმართა ცენტრის ესთეტიკური აღზრდის წრისა და „ TAMAR and KIDS PAPER FASHION SHOW“ სტუდიის ერთობლივი ღონისძიება, რუბრიკით „ქაღალდის სამოსი“. ჯერ კიდევ ერთი წლის წინ განხორციელებულმა მსგავსმა შოუმ დაიმსახურა ბავშვების, მშობლებისა და მასწავლებლების თბილი გამოხმაურება და მათივე თხოვნით წელსაც იქნა ორგანიზებული - მონაწილეთა მეტი რაოდენობით და უფრო ვრცელი გეოგრაფიით. ქაღალდის შოუ მიზნად ისახავს მეიორადი ქაღალდის მეშვეობით ბავშვების ფანტაზიის განვითარებას. ქაღალდის ტანსაცმელი ჰქონდა წარმოდგენილი 70 მონაწილეს, 86-ე,103-ე , 104-ე, 131-ე საჯარო სკოლებიდან და „ჰაიარტუნ“ ცენტრის ესთეტიკური აღზრდის წრიდან. შოუს საპატიო სტუმრები იყვნენ მთიანი ყარაბაღის რესპუბლიკიდან ჩამოსული „ნარეკაცი“ ხელოვნების კავშირის შუშის ცენტრის „არტთერაპია“ წრის წევრები, ცენტრის დირექტორის მიქაელ სარგსიანის და მასწავლებელ ჰასმიკ ესაიანის ხელმძღვანელობით.

„კეთილი სამარიელი“ არასამთავრობო ორგანიზაციამ მორიგი საქველმოქმედო აქცია გამართა გორის რაიონის სოფელ ხურვალეთის დევნილთა დასახლებაში. ამა წლის 2 აპრილს ხურვალეთში ჩავიდნენ საქართველოში „კეთილი სამარიელი“ ორგანიზაციის წარმომადგენელი კარენ ერიციანი, საქართველოს სომეხთა ეპარქიის გადამღები ჯგუფი და საქართველოს ახალგაზრდა იურისტთა კავშირის წევრები ირინა ჯეირანაშვილი, ხათუნა ლომჯარია და ანი პარანიცევა. მათ ბავშვებს ჩაუტანეს შორეულ ევროპაში მცხოვრები ბავშვების გულის სითბოთი და თითების სინაზით მომზადებული საჩუქრები თანატოლებისათვის. მშობლიური სახლებიდან აყრილმა და ამჟამად ხურვალეთში დამკვიდრებულმა 130-მა ბავშვმა სიხარულით მიიღო შორეული მეგობრების საჩუქრები, თვითონ კი სამაგიეროდ სიყვარული და მადლიერება გამოუცხადეს ევროპელ ბავშვებსა და „კეთილი სამარიელი“ ორგანიზაციის წარმომადგენლობას.