საქართველოს სომეხთა ეპარქიის „ჰაიარტუნ“ ცენტრის გალუსტ გიულბენკიანის სახელობის დარბაზში 5 აპრილს გაიმართა ცენტრის ესთეტიკური აღზრდის წრისა და „ TAMAR and KIDS PAPER FASHION SHOW“ სტუდიის ერთობლივი ღონისძიება, რუბრიკით „ქაღალდის სამოსი“. ჯერ კიდევ ერთი წლის წინ განხორციელებულმა მსგავსმა შოუმ დაიმსახურა ბავშვების, მშობლებისა და მასწავლებლების თბილი გამოხმაურება და მათივე თხოვნით წელსაც იქნა ორგანიზებული - მონაწილეთა მეტი რაოდენობით და უფრო ვრცელი გეოგრაფიით. ქაღალდის შოუ მიზნად ისახავს მეიორადი ქაღალდის მეშვეობით ბავშვების ფანტაზიის განვითარებას. ქაღალდის ტანსაცმელი ჰქონდა წარმოდგენილი 70 მონაწილეს, 86-ე,103-ე , 104-ე, 131-ე საჯარო სკოლებიდან და „ჰაიარტუნ“ ცენტრის ესთეტიკური აღზრდის წრიდან. შოუს საპატიო სტუმრები იყვნენ მთიანი ყარაბაღის რესპუბლიკიდან ჩამოსული „ნარეკაცი“ ხელოვნების კავშირის შუშის ცენტრის „არტთერაპია“ წრის წევრები, ცენტრის დირექტორის მიქაელ სარგსიანის და მასწავლებელ ჰასმიკ ესაიანის ხელმძღვანელობით.

ღონისძიება დაიწყო „მამაო ჩვენოთი“ და საქართველოს სომეხთა ეპარქიის წინამძღვრის კურთხევით. მონაწილეებმა ლამაზი სიარულით და მოძრაობებით წარმოადგინეს თავიანთი ჩანაფიქრით, თითების ოსტატობით გაზეთის ქაღალდით, მუყაოთი, ფოლგის ქაღალდით, ქაღალდის ხელსახოცებით, ცელოფნის პარკებით და სხვა მეორადი ნივთებით დამზადებული სამოსი - ქვედაბოლო, კაბა, ქუდი, სამკაულები. თითოეული მონაწილის გამოსვლას ახლდა მასწავლებლის კომენტარი.

არცახელი სტუმრების შოუ მიმდინარეობდა სომეხ პოეტთა ნაწარმოებებიდან ნაწყვეტების მხატვრული კითხვით, რაც უფრო გამომხატველს და შთამბეჭდავს ხდიდა მათ გამოსვლას.

სტუმრები, საქართველოში სრ ელჩის მოადგილე ვაჰაგნ აფიანი, თბილისის „სურბ ეჯმიაწინ“ ეკლესიის სულიერი მოძღვარი მღვდელი სამველ თოროსიანი, საქართველოს სომეხ მხატვართა კავშირის თავმჯდომარე მერუჟან შაუმიანი, საქართველოს ქალთა საბჭოს წევრები ქეთევან გაბუაშვილი, როზა კუხელაშვილი აღფრთოვანებით და გაოცებით ათვალიერებდნენ მოდის უჩვეულო ჩვენებას და მას უწოდეს ბავშვების ფანტაზიის განვითარების და ესთეტიკური გემოვნების ჩამოყალიბების საუკეთესო საშუალება.

ღონისძიების დასასრულს საქართველოს სომეხთა ეპარქიის წინამძღვარმა დამსწრეებს მოულოცა წმიდა გრიგორ ლუსავორიჩის (განმანათლებლის) დღესასწაული. მან მაღალი შეფასება მისცა ესთეტიკოს თამარ სულხანიშვილის სამუშაოს, ბავშვებთან ლამაზის აღქმის მიმართულებით. ეპარქიის წინამძღვარი მიესალმა „ნარეკაცი“ ხელოვნების კავშირის შუში ქალაქის ცენტრთან „ჰაიარტუნ“ ცენტრის თანამშრომლობას და არცახელი ბავშვების მონაწილეობას ღონისძიებაში.

ქაღალდის შოუს ყველა მონაწილეს გადაეცა სიგელი და „კეთილი სამარიელი“ ორგანიზაციის საჩუქრები.