Ընթացիկ տարվա հունվարի 23-ին, Թբիլիսիում տեղի ունեցավ քրիստոնյաների միասնության ամենամյա էկումենիկ աղոթքը: Այս անգամ այն կայացավ Լյութերական Եկեղեցում և աղոթքի կարգախոսն էր «Ջուր տուր»: Էկումենիկ աղոթքին մասնակցում էին Հայ Առաքելական Սուրբ Եկեղեցու Վիրահայոց թեմի առաջնոդ Գերաշնորհ Տեր Վազգեն եպիսկոպոս Միրզախանյանը, Անդրկովկասի լատինական կաթոլիկների առաքելական վարչության առաջնորդ Ջուզեպպե եպիսկոպոս Պազոտտոն, Վրաստանում Ավետարանական-լյութերական Եկեղեցու առաջնորդ Հանս-Իոիահիմ եպիսկոպոս Կիդերլենը, Վրաստանում Ավետարանական-մկրտական Եկեղեցու առաջնորդներ եպիսկոպոսներ Մերաբ Գափրինդաշվիլին և Ռուսուդան Գոցիրիձեն: Աղոթքին մասնակցում էին ինչպես վերը նշված, այնպես էլ այլ քույր եկեղեցիների և հարանվանությունների հոգևոր դասը և հավատացյալների խմբեր: Աղոթքին ներկա էին նաև Վրաստանի իսլամական համայնքի ներկայացուցիչները:

Ընթացիկ տարվա հունվարի 21-ին, Թբիլիսիի Սուրբ Էջմիածին եկեղեցում, կատարվեց հոգեհանգստյան արարողություն և մոմավառություն՝ ի հիշատակ հունվարի 19-ին մահացած 6-ամսեկան Սերյոժա Ավետիսյանի և հունվարի 12-ին Գյումրիում դաժանաբար սպանված Ավետիսյանների ընտանիքի մյուս անդամների:

Ընթացիկ տարվա հունվարի 18-ին, Թբիլիսիի Սուրբ Էջմիածին եկեղեցում, հավարտ կիրակնօրյա Սուրբ Պատարագի, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հանդիսապետությամբ, կատարվեց հոգեհանգստյան արարողություն՝ ի հիշատակ Գյումրիում զոհված Ավետիսյանների ընտանիքի 6 անդամների:

2015 թվականի առաջին տաղավար տոնը՝ Սուրբ Ծննդյան և Աստվածհայտնության ավետիսը Վիրահայոց թեմում նշվեց պատշաճ հանդիսությամբ: Դեռևս հունվարի 5-ի երեկոյան Վիրահայոց թեմի եկեղեցիներում մատուցվեց Ճրագալույցի Սուրբ Պատարագ: