Հայկական խոհանոցի ազգային կերակրատեսակներից աշխարհին իր յուրահատկությամբ ներկայանալու հերթը համով-հոտով խորովածինն էր:Արդեն 7-րդ անգամ անընդմեջ աշնանային գեղեցիկ օրը մշուշապատվում է խորովածի ախորժալի բուրմունքից և շուրջբոլորը տարածվող գրգռիչ ծխի քուլաներից: 2015 թվականի սեպտեմբերի 12-ին ավանդական խորովածի փառատոնը Ալավերդիի շրջանի Ախթալայի բաց տարածքում հավաքել էր ոչ միայն այս ուտեստը համտեսելու երկրպագուներին, այլև իսկական հայկական խորոված պատրաստելու սիրահարներին, նաև իրենց վարպետությունը, դիզայներական երևակայությունը ներկայացնող ռեստորանային համալիրների խոհարարներին,ովքեր ավանդականի հետ միասին դրսևորում էին այն նորամուծությունները, որ կրել է այս ճաշատեսակն իր զարգացման ճանապարհին:

2015 թվականի սեպտեմբերի 13-ին, Հայ Եկեղեցու հինգ տաղավար տոներից վերջին՝ Խաչվերաց տոնի կապակցությամբ Թբիլիսիի Սուրբ Էջմիածին եկեղեցում իր անդրանիկ Պատարագը մատուցեց Վեհափառ Հայրապետի տնօրինությամբ Վիրահայոց թեմում ծառության նշանակված Տեր Խորեն վարդապետ Հովհաննիսյանը:

2015 թվականի սեպտեմբերի 12-ին, ձեռամբ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի, կատարվեց Նինոծմինդայի շրջանի Մեծ Արագյալ գյուղի «Սուրբ խաչ» եկեղեցու և զանգակատան գմբեթների խաչերի և զանգի օծման կարգը:

2015 թվականի սեպտեմբերի 9-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ Հայոց Ցեղասպանության ականատես երջանկահիշատակ Լևոն Դիլբարյանի «Հուշեր անցյալից» հայերեն-ռուսերեն գրքի շնորհանդեսը: Միջոցառումն իրականացավ «Հայկական գիտա-հետազոտական կենտրոն Վրաստանում» ոչկառավարական կազմակերպության նախաձեռնությամբ և Վիրահայոց թեմի «Հայարտուն» կենտրոնի աջակցությամբ, և նվիրված էր Հայոց Ցեղասպանության նահատակների 100-րդ տարելիցին: