Ն. Ս. Օ. Տ. Տ. Գարեգին Բ. Ամենայն Հայոց Կաթողիկոսի օրհնությամբ, ԱՄՆ Արեւմտյան  հայոց  թեմի  առաջնորդ,  Հայ  Եկեղեցու  Երիտասարդաց Միավորման (ՀԵԵՄ) նախագահ Գերաշնորհ Տ. Հովնան արքեպիսկոպոս Տերտերյանի նախագահությամբ, 2015 թվականի հուլիսի 1-ին , Մայր Աթոռ Սուրբ Էջմիածնի Գևորգյան հոգևոր ճեմարանի հանդիսությունների սրահում մեկնարկեց Հայ Եկեղեցու Երիտասարդաց Միավորման (ՀԵԵՄ) 3-րդ պատգամավորական ժողովը:

Հայոց Ցեղասպանության 100-րդ տարելիցի ոգեկոչման միջոցառումների շրջանակներում, Վիրահայոց թեմում կազմակերպվեց երկօրյա ուխտագնացություն դեպի Արևմտյան Հայաստանի պատմական վայրեր: 2015 թվականի հունիսի 24-ին, Թբիլիսիի Սուրբ Գևորգ առաջնորդանիստ եկեղեցու հոգևոր հովիվ Տեր Նարեկ քահանա Ղուշչյանի գլխավորությամբ, ուխտավորների շուրջ 40 հոգուց բաղկացած խումբը ուղևորվեց պատմական հայրենիքի Կարս, Սարիղամիշ և Անի քաղաքներ: Ուխտավորների շրջանում մեծամասնություն էին կազմում Մեծ Եղեռնի տարիներին մազապուրծ փրկված և Վրաստանում, մասնավորապես Թբիլիսիում հաստատված փախստականների սերունդները:

2015 թվականի հունիսի 27-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում հավաքվել էին թեմի երիտասարդ աշխատակիցները: Նորերս ստեղծված «Բուժակների ակումբի» անդամ, Վրաստանի բժշկական բարձրագույն ուսումնական հաստատությունների հայ ուսանողները որոշեցին դասախոսություն անցկացնել հատկապես Թեմի և «Հայարտուն» կենտրոնի աշխատակիցների համար, նրանց ծանոթացնելով առաջին օգնությունը ցուցաբերելու ճիշտ կանոնների հետ:

2015 թվականի հուլիսի 1-ը դարձավ Վիրահայոց թեմի «Հայարտուն» կենտրոնի «Հայոս բենդ» վոկալ-գործիքային համույթի (ղեկավար՝ Վլադիմիր Ասատուրով) ինքնահաստատման անմոռանալի օր: Կենտրոնի Գալուստ Գյուլբենկյան սրահում կայացած հաշվետու համերգը իր հնչեղությամբ, վարպետ կատարումներով և բարձրարժեք կառուցվածքով իսկական անակնկալ էր համույթի անդամների ծնողների, ընկերների և Վիրահայոց թեմի պաշտոնեության համար: