2015 թվականի սեպտեմբերի 8-ին, Վիրահայոց թեմի «Սուրբ Մովսես Խորենացի» նախակրթարանում մեկնարկեց 2015-16 ուսումնական տարին: Վաղ առավոտից ուրախ աշխուժություն էր տիրում Թբիլիսիի Սուրբ Էջմիածին եկեղեցու բակում: Գույնզգույն ծաղկեփնջերով շուրջ 50 հայ մանուկներ իրենց ծնողների հետ, ուսուցիչների ուղեկցությամբ եկել էին մասնակցելու առավոտյան ժամերգությանը և ստանալու Վիրահայոց թեմի առաջնորդի օրհնությունը:

2015 թվականի հուլիսի 21-ից օգոստոսի մեկը, ՀՀ Սփյուռքի նախարարության «Ամառային դպրոց» ծրագրի շրջանակներում կազմակերպված «Սփյուռքի համայնքային գործի կազմակերպիչներ» դասընթացին մասնակցեցին Վիրահայոց թեմի Երիտասարդական բաժնի (տնօրեն՝ Վալերի Բադալյան) ակտիվիստներ Թամար Սիմոնյանը, Ալինա Բալիոզյանը և Դավիթ Խարազովը: Դասընթացին, որի  նպատակն էր աջակցել Սփյուռքի համայնքային կառույցների գործունեությանը, հայապահպանական ծրագրերի արդյունավետության և համայնքային գործի կազմակերպիչների պատրաստվածության մակարդակի բարձրացմանը, մասնակցում էին ԱՄՆ-ի, Կանադայի, Բուլղարիայի, Ռուսաստանի Դաշնության և այլ երկրներից ժամանած հայ համայնքի երիտասարդ ղեկավարներ և գործուն անդամներ:

Վրաստանի սպորտի և երիտասարդության հարցերով նախարարության նախաձեռնությամբ կազմակերպված ամառային հանգստի ճամբարի երրորդ փուլին այս տարի մասնակցեցին Վիրահայոց թեմի երիտասարդական բաժնի ակտիվիստներ Սերգեյ Կամալովը, Ռոզիտա Գամբարովան, Արմինե Ղուշչյանը, Մարիաննա Կիրակոզովան և Միլենա Գալուստովան: Ճամբարային կյանքին ընդգրկված էին բարձրդասարանցիներ և ուսանողներ, ովքեր ուրախ հանգսսստի հետ միասին անց էին կացնելու հնէաբանական պեղումներ:

2015 թվականի  օգոստոսի 24-ին,   Վրաստանի Սահմանադրության 20-ամյակի առիթով   Վրաստանի նախագահի  նստավայրում  կայացավ հանդիսավոր  ընդունելություն: Վրաստանի նախագահ  Գիորգի Մարգվելաշվիլու անունից միջոցառմանը  հրավիրվել էին  Վրաստանի խորհրդարանի անդամներ, գործադիր  և դատական իշխանության ներկայացուցիչներ, վրացի և  այլազգի  հյուրեր:  Դիվանագիտական կորպուսի  ներկայացուցիչների շրջանում էրՎրաստանում ՀՀ  արտակարգ և լիազոր դեսպան պարոն Յուրի Վարդանյանը: