საქართველოს სომეხთა ეპარქიის კულტურულ-საგანმანათლებლო და ახალგაზრდული „ჰაიარტუნ“ ცენტრის მიერ ინიცირებული მორიგი კულტურული ღონისძიება იყო მუსიკის მოყვარული სომეხი საზოგადოების შეხვედრა საქართველოს დამსახურებულ არტისტ, კომპოზიტორ ნუნუ გაბუნიასთან. ღონისძიების წამყვანმა ანა პოღოსოვამ წარადგინა ცნობილი კომპოზიტორის მოკლე ბიოგრაფია, მისი შემოქმედება - ცნობილი სიმღერები, საბავშვო ნაწარმოებები, კინოსა და ანიმაციური ფილმებისთვის დაწერილი მუსიკა. მაღალი შეფასება მიეცა საქართველოს კულტურისა და ძეგლთა დაცვის სამინისტროს ინიციატივით, 2012 წლის ნოემბერში თბილისის საკონცერტო დარბაზის წინ გახსნილ საქართველოს დამსახურებული არტისტის, თბილისის საპატიო მოქალაქის ნუნუ გაბუნიას ვარსკვლავს.

ნინოწმინდის რაიონის სოფელ დიდ არაგიალში 24 ივნისს, საქართველოს სომეხთა ეპარქიის წინამძღვრის ეპისკოპოს ვაზგენ მირზახანიანის საპატიო წინამძღოლობით, ჯავახეთის საერთო ეპარქიალური ვიკარიატის ვიკარიუსის არქიმანდრიტ ბაბგენ სალბიანისა და სამღვდელოების მონაწილეობით შესრულდა სოფლის დანგრეული უძველესი „სურბ ხაჩ“ ეკლესიის საფუძვლის ჩაყრის ცერემონიალი.

საქართველოს სომეხთა ეპარქიის „ჰაიარტუნ“ ცენტრის დიდ დარბაზში მიმდინარე წლის 22 ივნისს გაიმართა კონცერტი, რომელიც ცენტრის შემოქმედებითი წრეების ერთი წლის სამუშაოთა ანგარიშად იქცა. კონცერტს ესწრებოდნენ საქართველოში სომხეთის საელჩოს მრჩეველი კარენ მელიქიანი, ეპარქიის სამღვდელოება, ცენტრის თანამშრომლები, მშობლები, სტუმრები. ღონისძიება გაიხსნა ლოცვითა და საქართველოს სომეხთა ეპარქიის წინამძღვრის ეპისკოპოს ვაზგენ მირზახანიანის კურთხევით.

ამა წლის 21 ივნისს საქართველოს სომეხთა ეპარქიის „ჰაიარტუნ“ ცენტრის გალუსტ გიულბენკიანის სახელობის დარბაზში გაიმართა "სურბ მოვსეს ხორენაცი“ საბავშვო ბაღის 2013-2014 სასწავლო წლის გამოსაშვები ჯგუფის ზეიმი. საზეიმოდ მორთულ დარბაზს ამშვენებდა სკოლამდელთა ლამაზი სამოსი და ყვავილების სიუხვე.