2015 թվականի դեկտեմբերի 28-ին, Վրաստանի կրոնի հարցերով պետական գործակալության ղեկավար Զազա Վաշախմաձեն, Պետական գրասենյակում հանդիպեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հետ: Հանդիպմանը քննարկվեցին փոխհամագործակցության ձևաչափով 2016 թվականին քննարկվելիք թեմաները և հարցերը:

2015 թվականի դեկտեմբերի 28-ին, Հայ Առաքելական Սուրբ Եկեղեցու Վիրահայոց թեմը, համագործակցությամբ Հայաստանի Հանրապետության Սփյուռքի նախարարության հետ, ամանորյա նվերներ տրամադրեց ՀՀ Տավուշի թեմի առաջնորդարանին՝ սահմանամերձ բնակավայրերի դպրոցականներին բաժանելու համար:

2015 թվականի դեկտեմբերի 26-27-ը Վրաստանի «Գիտակներ ակումբի» (նախագահ՝ Արտակ Այվազյան) համար հետաքրքրություններով հագեցած մրցութային եռուն օրեր էին: Շուրջ երեք ամիս շարունակվող և գրեթե ամեն շաբաթ օր ընթացող մրցաշարը նորանոր թիմեր էր ներգրավում իր շուրջը: 2015 թվականի մրցույթին մասնակցեցին «Վասպուրական» թիմը՝ ավագ Դավիթ Խարազովի, «Մատյան գունդ» թիմը՝ Կարեն Հովհաննիսյանի, «Կիլիկիա» թիմը՝ Հրաչյա Սուրմալյանի, «Ուրարտու» թիմը՝ Հարություն Իրիցյանի, «Ալիքմեդիա» թիմը՝ Արսեն Խառատյանի գլխավորությամբ:

2015 թվականի դեկտեմբերի 26-ին Վիրահայոց թեմի Ախալքալաքի Սուրբ Խաչ եկեղեցու բակը լեցուն էր երեխաներով, որոնք եկել էին մասնակցելու Ամանորին և Սուրբ Ծննդյանը նվիրված ցուցահանդեսին և կայանալիք տոնական համերգին, որը վարում էին Սամցխե-Ջավախքի և Ծալկայի ընդհանուր առաջնորդական փոխանորդության երիտասարդական միության անդամներ՝ Հարություն Կարախանյանը և Անահիտ Բարբառյանը: