ამა წლის 22 აპრილს საქართველოს სომეხთა ეპარქიის „ჰაიარტუნ“ ცენტრის ინიციატივით და საქართველოში სრ საელჩოსა და საქართველოს ეროვნული ბიბლიოთეკის მხარდაჭერით, ეროვნული ბიბლიოთეკის თბილისის ერთ-ერთ დარბაზში გაიმართა თბილისელი სომეხი პროზაიკოსის ცხონებული წერუნ თორგომიანის სომეხთა გენოციდისადმი მიძღვნილი მოთხრობათა კრებულის პრეზენტაცია. ღონისძიებაში, საკუთარი პაპის ხსოვნის წინაშე ქედის მოხრის ნიშნად, მონაწილეობდა საქართველოში სრ საელჩოს მრჩეველი, წერუნ თორგომიანის შვილიშვილი ლევონ თორგომიანი.

21 აპრილს თბილისის „სურბ ეჯმიაწინ“ ეკლესიის ეზოში გაიმართა სომეხთა გენოციდის მსხვერპლთა ხსოვნისადმი მიძღვნილი ხაჩქარის კურთხევის ცერემონიალი. ხაჩქარის დადგმა ინიცირებული იყო საქართველოს სომეხთა ეპარქიის მიერ, პეტერბურგში მცხოვრები ეთნიკურად სომეხი ჰრაჩია პოღოსიანის ქველმოქმედებით. ეს პირველია თბილისში. ხაჩქარი მომზადებულია სომხეთში და ის ძველ ჯუღაში აზერბაიჯანელი სამხედროების მიერ განადგურებულ ათასობით ხაჩქართაგან ერთის ანალოგია (ოსტატი: ვარაზდატ ჰამბარძუმიანი).

წმინდა აღდგომის დღესასწაული საქართველოს სომეხთა ეპარქიაში აღინიშნა სომხური ეკლესიის წესებისა და რიტუალების შესაბამისად. როგორც „ჭრაგალუიცის“ საღამოს, ასევე წმინდა აღდგომის დღეს თბილისში, სამცხე-ჯავახეთში, მარნეულის რაიონში, ბათუმში უამრავ მორწმუნეთა მონაწილეობით, გაიმართა წმინდა რიტუალები. და ვინაიდან წელს ქართული მართლმადიდებელი ეკლესიის დღესასწაული დაემთხვა სომეხთა ეკლესიის აღდგომის დღესასწაულს, მას უფრო საზეიმო და ხალხმრავალი სახე მიეცა.

19 აპრილს, საღამოს, თბილისის „სურბ ეჯმიაწინ“ ეკლესიაში „ჭრაგალუიცის“ წმიდა წირვამდე თბილისის 103 სკოლის სომხური სექტორის (სასწავლო ნაწილის გამგე: ჰასმიკ პაპიკიანი) მოსწავლეებმა ჩაატარეს „წმიდა აღდგომა“ ლიტერატურულ-მუსიკალური მონტაჟი. ღონისძიებაში მონაწილეობდა რუსული განყოფილების ეთნიკურად სომეხი პირველიდან მეოთხე კლასის 15 მოსწავლე, რომლებიც მიმდინარე წლის დასაწყისში გადავიდნენ სომხურ განყოფილებაში და მასწავლებლების მხარდაჭერით სწავლობენ სომხურ ენას. ღონისძიების ორგანიზატორის, სომხური ენისა და ლიტერატურის პედაგოგის გაიანე მხითარიანის იდეით, ამ მოსწავლეთა პირველი დამოუკიდებელი გამოსვლა მშობლიურ ენაზე, როგორც ნათლობა, გაიმართა ეკლესიის თაღებს ქვეშ. ეკლესიაში, სამღვდელოების წარმომადგენლები, შეკრებილი მორწმუნეები, მშობლები, სტუმრები გახდნენ მოსწავლეების ლამაზი დეკლამაციისა და სიმღერის მსმენელნი.