საქართველოს სომეხთა ეპარქიის ახალგაზრდობის საკითხთა განყოფილების (დირექტორი: ვალერი ბადალიანი) ინიციატივითა და საქართველოს სომეხთა ეპარქიის მხარდაჭერით დედაქალაქის სკოლებს შორის ჩატარდა „ჰაიარტუნ“ თასის გათამაშების ფეხბურთის ტურნირი. ტურნირში მონაწილეობის განაცხადი წარადგინეს თბილისის 81-ე, 84-ე, 92-ე, 96-ე, 98-ე და 104-ე საჯარო სკოლების IX-XI კლასების მოსწავლეებით დაკომპლექტებულმა ახალგაზრდა ფეხბურთელთა გუნდებმა.

ეპარქიის ახალგაზრდული განყოფილების სათანადოდ გატარებული საორგანიზაციო სამუშაოს შედეგად 21 ნოემბერს ტურნირი დაიწყო. ის ჩატარდა 104-ე სკოლის ღია სპორტულ მოედანზე. პირველ დღეს სამი მატჩი გაიმართა. დაძაბული ბრძოლის შემდეგ ფინალში მონაწილეობის ზღვარი გადალახეს 96-ე და 84-ე სკოლების გუნდებმა.

ტურნირის ფინალური მატჩი გაიმართა 29 ნოემბერს. იმდენად დიდი იყო გამარჯვებისა და თასის ფლობის სურვილი, რომ არახელსაყრელმა ამინდმაც კი არ შეუშალა ხელი შეხვედრის ჩატარებას. თასის გათამაშების ფინალში შეხვდენენ 84-ე (დირექტორი: მანანა ბატიკაძე, ფიზაღზრდის მასწავლებელი: კახა ნიკოლაძე) და 96-ე (დირექტორი: სუსანა შოშიაშვილი, ფიზაღზრდის მასწავლებელი: ნანა ჭეიშვილი) სკოლების გუნდები. უკომპრომისო და დაძაბული თამაშის შემდეგ, რომელიც მიმდინარეობდა გულშემატკივართა მხარდაჭერით, შეხვედრა დასრულდა ანგარიშით 3: 1. გამარჯვებული გუნდის ტიტული და „ჰაიარტუნ“ თასის ფლობის პატივი ერგო 84-ე სკოლის გუნდს.

საზეიმო პირობებში საქართველოს სომეხთა ეპარქიის „ჰაიარტუნ“ ცენტრის ხელმძღვანელმა ლევონ ჩიდილიანმა თასი გადასცა გამარჯვებული გუნდის კაპიტანს - თენგიზ ანთაძეს. ტურნირის ყველა მონაწილემ მიიღო „ჰაიარტუნ“ თასის გათამაშების ტურნირში მონაწილეობის სერტიფიკატი. ტურნირის ყველა შეხვედრის მსაჯი გახლდათ ფეხბურთის საერთაშორისო ფედერაციის ასოციაციის - ფიფა-ს, სერტიფიკატის მქონე მსაჯი სეირან პოზოიანი.

საქართველოს სომეხთა ეპარქიის ახალგაზრდობის საკითხთა განყოფილება მადლობას უხდის საქართველოს სომეხთა ეპარქიის წინამძღვარს, ეკლესიის ერთგულ მიქაელ არაბაჯიანს და თბილისის 104-ე საჯარო სკოლის დირექციას „ჰაიარტუნ“ თასის გათამაშების ფეხბურთის ტურნირის ჩატარების მხარდაჭერისათვის. ტურნირის ორგკომიტეტი გაცნობებთ, რომ აღნიშნული თასის გათამაშება ჩატარდება ყოველწლიურად და მოუწოდებს ახალგაზრდულ გუნდებს აქტიურად ჩაერთონ 2015 წელს ჩასატარებელ სპორტის ამ სახეობის შეჯიბრებებში.