ჩვენი უფლის იესო ქრისტეს შობისა და ნათლისღების ბრწყინვალე დღესასწაული საზეიმოდ აღინიშნა ქვემო ქართლის რეგიონის დაბა შაუმიანსა და სოფელ წითელში.

2018 წლის 6 იანვარს, საქართველოს სომეხთა ეპარქიის შაუმიანის „სურბ ასტვაწაწინ“ ეკლესიაში საღმრთო ლიტურგია აღავლინა და წყლის კურთხევის რიტუალი შეასრულა საქართველოს სომეხთა ეპარქიის ქვემო ქართლის რეგიონის მარნეულის, ბოლნისის და თეთრიწყაროს რაიონების სულიერმა მოძღვარმა ღირსმა მღვდელმა ჰუსიკ ჰარუთუნიანმა.

საღმრთო ლიტურგიის დროს მწირველმა მღვდელმა დამსწრეებს გადასცა საქართველოს სომეხთა ეპარქიის წინამძღვრის, მისი ყოვლადუსამღვდელოესობის, ეპისკოპოს ვაზგენ მირზახანიანის მამობრივი კურთხევა და მილოცვა.

შემდეგ მღვდელმა ჰუსიკ ჰარუთუნიანმა წმინდა მირონით აკურთხა წყალი, რომელიც დაურიგდა ხალხს.

საღამოს ღვთისმსახურება აღევლინა და წყლის კურთხევის რიტუალი აღესრულა ასევე სოფელ წითელის „სრბოც ავეტარანჩაც“ სამლოცველოში. დღე ნამდვილად საზეიმოდ იქცა სოფლის I-III კლასელთათვის, რომლებმაც „ანონიმური ქველმოქმედისგან“ საახალწლო საჩუქრები მიიღეს.

შობისა და ნათლისღების დღეს საქართველოს სომეხთა ეპარქიის წინამძღვრის, მისი ყოვლადუსამღვდელოესობის, ეპისკოპოს ვაზგენ მირზახანიანის ინიციატივით, დაბა შაუმიანსა და სოფელ წითელში მოეწყო საყოველთაო ნათლობა. ღირსმა მღვდელმა ჰუსიკ ჰარუთუნიანმა მონათლა ქვემო ქართლის ორი სოფლის 40-ზე მეტი სხვადასხვა ასაკის პირი, რომელთაც განიცადეს ქრისტიანული რიტუალით მინიჭებული სულიერი სიხარული და ბედნიერება.

მორწმუნეები მადლიერებას გამოუხატავენ საქართველოს სომეხთა ეპარქიის წინამძღვარს, იმის გამო, რომ ყოველთვის ყურადღების ცენტრში ჰყავს თემები, და სულიერ მოძღვარს - სასულიერო მსახურების ერთგულებით განხორციელებისთვის.