ՀՀ նախագահ Սերժ Սարգսյանի Վրաստան կատարած պաշտոնական այցի շրջանակներում, Սայաթ-Նովայի 300-ամյակին նվիրված գալա-համերգին մասնակցեց նաև ճանաչված երգչուհի Եվա Ռիվասը, ով հունիսի 19-ին սիրով հյուրընկալվեց Վիրահայոց թեմի «Հայարտուն» կենտրոնում: Հանդիպմանը ներկա էին ճանաչված երգչուհու երգացանկի երկրպագուները:

2014 թվականի մայիսի 31-ից հունիսի 10-ը Վիրահայոց թեմից մի խումբ երիտասարդներ մասնակցեցին Summer Together փոխանակման ծրագրին, որը Եվրամիության ֆինանսական աջակցությամբ իրականացվեց Հայաստանի Ջերմուկ հանգստավայրում: Նախագծում ընդգրկված էին Ֆրանսիայից, Էստոնիայից, Վրաստանից և Հայաստանից ժամանած շուրջ 30 երիտասարդներ: Վրաստանը, մասնավորապես Վիրահայոց թեմի «Հայարտուն» կրթա-մշակութային և երիտասարդական կենտրոնը, ներկայացնում էին՝ Ռեվիկ Կարապետյանը, Լանա Ադամյանը, Միլենա Գալուստովան, Էլենե Ջարիաշնելին, Դիանա Պարոնյանը, Դիանա Հովհաննիսյանը և Մարինա Սարգսյանը:

ՀՀ նախագահ պարոն Սերժ Սարգսյանը և նրանց ուղեկցող պատվիրակության անդամները, Վրաստան կատարած այցի շրջանակներում, հունիսի 19-ին, այցելեցին Թբիլիսիի Սուրբ Էջմիածին եկեղեցի: Բարձրաստիճան հյուրերին դիմավորեցին Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը, հոգևոր դասը, Վրաստանում ՀՀ դեսպանության դիվանագետներ, վիրահայ համայնքի ներկայացուցիչները:

Երկու տարի առաջ Ջավախքում հաստատված հայաստանաբնակ երիտասարդ նկարիչ Արման Թորոսյանի և նրա գործընկեր Հրաչյա Սաֆարյանի կողմից կատարվեցին այս տարածաշրջանի գեղատեսիլ բնաշխարհում գործող 33 հայկական եկեղեցիների էտյուդային աշխատանքներ, որոնք առաջին անգամ ցուցադրվեցին Ախալքալաքում, այնուհետև Նինոծմինդայում: