2014 թվականի մայիսի 31-ից հունիսի 10-ը Վիրահայոց թեմից մի խումբ երիտասարդներ մասնակցեցին Summer Together փոխանակման ծրագրին, որը Եվրամիության ֆինանսական աջակցությամբ իրականացվեց Հայաստանի Ջերմուկ հանգստավայրում: Նախագծում ընդգրկված էին Ֆրանսիայից, Էստոնիայից, Վրաստանից և Հայաստանից ժամանած շուրջ 30 երիտասարդներ: Վրաստանը, մասնավորապես Վիրահայոց թեմի «Հայարտուն» կրթա-մշակութային և երիտասարդական կենտրոնը, ներկայացնում էին՝ Ռեվիկ Կարապետյանը, Լանա Ադամյանը, Միլենա Գալուստովան, Էլենե Ջարիաշնելին, Դիանա Պարոնյանը, Դիանա Հովհաննիսյանը և Մարինա Սարգսյանը:

Ծրագրի նպատակն էր ոչձևական կրթության սկզբունքի հիման վրա երիտասարդներին սովորեցնել թիմում աշխատելու, օտար և անծանոթ մարդկանց հետ լեզու գտնելու և այլ խնդիրներ լուծելու ստեղծագործական մոտեցումները: Ուսուցման ծրագիրը ներառնում էր սեմինարներ, քննարկումներ, միջմշակութային երեկոներ, աշխատանք խմբում, տարբեր խաղեր և առաջադրանքներ: Կարևորություն էր տրվում նաև շնորհանդեսներ կազմակերպելուն և նախագծեր կազմելուն, որոնք օժանդակում են անկախ մտածելակերպի և լիդերության գծերի զարգացմանը: Երիտասարդները սովորում էին նաև ամառային ճամբար կազմակերպելու վարպետությունը: Նախագծի աշխատանքային լեզուն անգլերենն էր:

Վրաստանի թիմը արժանիորեն ներկայացրեց իր երկիրը և «Հայարտուն» կենտրոնը: Այլ երկրների ներկայացուցիչներին զարմացրեց Վիրահայոց թեմի «Հայարտուն» կրթա-մշակութային և երիտասարդական կենտրոնի գործունեության լայն տեսադաշտը: Միջմշակութային երեկոյի ժամանակ Վրաստանից ժամանած երիտասարդները ցուցադրեցին վրաց ժողովրդի բարեսրտությունն ու հյուրընկալությունը, երկրի տարազները, պարերը, երաժշտությունը և պատմությունը:

Նախագծի տպավորիչ պահերից էին «Տաթևի թևեր» ճոպանուղին և ուխտագնացությունը Տաթևի մենաստան, Տեր Միքայել Գևորգյանի պատմածը մենաստանի հիմնադրման մասին և մատուցեց ծառայությունը: Կայացավ նաև հանդիպում քաղաք Եղեգնաձորի երիտասարդության հետ, որտեղ նախագծի մասնակիցները, գործնականում կիրառելով ձեռք բերած գիտելիքները, ինքնուրույնաբար կազմակերպեցին մի քանի մտավոր և զվարճալի խաղեր: