Վիրահայոց թեմի երիտասարդության հարցերի բաժինը (տնօրեն՝ Վալերի Բադալյան) մեծ ակտիվությամբ մասնակցեց ՀՀ Սփյուռքի նախարարության Սփյուռքի երիտասարդների հայրենաճանաչության 2014 թվականի «Արի տուն» ծրագրին: 55 երիտասարդներ (Մառնեուլի շրջանից 15 և Թբիլիսիից 40 ակտիվիստներ) ընդգրկվեցին ծրագրի երեք փուլերին: Ժամանակին և լավ իրականացված նախապատրաստական-կազմակերպչական աշխատանքի արդյունքում, Վիրահայոց թեմը ներկայացնող խմբերը աչքի ընկան բարձր կարգապահությամբ, ազգագրական մշակույթի իմացությամբ և օրինակելի վարքով: Հատկանշական է, որ մասնակիցների ներգրավումը ծրագրի փուլերին իրականացվում էր բաժնի տնօրենի ներկայությամբ և անմիջական վերահսկողությամբ: Վիրահայ 13-18 տարեկան երիտասարդները երկշաբաթյա փուլերով հյուրընկալվեցին հայաստանաբնակ ընտանիքներում, Ծաղկաձորում մասնակցեցին ծրագրի ճամբարային փուլին:

Ընթացիկ տարվա հուլիսի 11-ից 22-ը Վիրահայոց թեմի երիտասարդական բաժնի (տնօրեն՝ Վալերի Բադալյան) ակտիվիստ 24 տղաներ ու աղջիկներ, Հովհաննես Շահնազարյանի գլխավորությամբ, իրենց ամառային հանգիստը անցկացրեցին ՀՀ Լոռու մարզի Լերմոնտովո հովտում գտնվող «Անդրանիկ» սկաուտական ճամբարում: ՀԲԸՄ երիտասարդական ծրագրերի շրջանակներում անցկացվող սկաուտական ճամբարի այս փուլին մասնակցում էին Լիբանանի, Սիրիայի, Դուբայի, Թբիլիսիի և Երևանի խմբերը ներկայացնող 135 սկաուտներ: Հուլիսի 13-ին տրվեց ճամբարային կյանքի մեկնարկը: Սկաուտական բանակի բացման արարողությանը ներկաներին իր օրհնությունը բաշխեց Գուգարաց Թեմի Առաջնորդ Գերաշնորհ Տեր Սեպուհ արքեպիսկոպոս Չուլջյանը:

Հուլիսի 22-ին Վրաց Ուղղափառ Սուրբ Եկեղեցու Պատրիարքարանում կայացավ հանդիպում Վրաց Եկեղեցու Պատրիարքարանի միջեկեղեցական հարաբերությունների բաժնի ղեկավար և Զուգդիդի և Ցաիշի միտրոպոլիտ Գերասիմի և Վիրահայոց թեմի առաջնորդ Տեր Վազգեն եպիսկոպոս Միրզախանյանի միջև, որին մասնակցում էին Պատրիարքարանի մամլո խոսնակ Միքայել Բոտկովելին և Վիրահայոց թեմի սոցիալական ծառայության ղեկավար Միքայել Ավագյանը:

Վրաստանի նախկին նախագահ Էդուարդ Շևարդնաձեի հուղարկավորությանը ՀՀ պաշտոնական պատվիրակության մասնակցության շրջանակներում, ՀՀ Ազգային ժողովի նախագահ Գալուստ Սահակյանը, ՀՀ Արդարադատության նախարար Հովհաննես Մանուկյանը, ՀՀ Ազգային ժողովի պատգամավոր Վարդան Այվազյանը, Ազգային ժողովի աշխատակազմի ղեկավար Հրայր Թովմասյանը և ուրիշներ, հուլիսի 14-ին այցելեցին Թբիլիսիի Սուրբ Գևորգ եկեղեցի: Հյուրերի կազմում էին Վրաստանում ՀՀ գործերի ժամանակավոր հավատարմատար Վահագն Աֆյանը և դեսպանության խորհրդական Կարեն Մելիքյանը: