2016 թվականի ապրիլի 21-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահի պատերը զարդարել էին Հայաստանի Հանրապետության Էջմիածին քաղաքի նկարչուհիներ Արևիկ Մկրտչյանի, Մանան Մուրադյանի և Գոհար Հարությունյանի կտավները: Շուրջ 3 տասնյակ գեղանկար աշխատանքների ցուցադրությունը «Վերածնունդ» խորագրով նախաձեռնել էր Վիրահայոց թեմի «Հայարտուն» կենտրոնը, Վիրահայոց թեմի և Էջմիածնի քաղաքապետարանի մշակույթի բաժնի աջակցությամբ, Վրաստանի հայ նկարիչների և Վրաստանի հայ կանանց »Շուշանիկ» միության գործընկերությամբ: Ցուցահանդեսն իրականացավ Վիրահայոց թեմի՝ Հայոց Ցեղասպանության սրբադասված նահատակների 101-րդ տարեդարձի հիշատակի միջոցառումների շրջանակում:

Հանրային իրավունքի իրավաբանական անձ ՆԱՏՕ –ի և Եվրամիության տեղեկատվական կենտրոնի նախաձեռնությամբ և «ՆԱՏՕ-ի շաբաթ» ծրագրի շրջանակներում, 2016 թվականի ապրիլի 16-ին կազմակերպվեց հայ երիտասարդների ճանաչողական էքսկուրսիան Վրաստանի նախագահի նստավայր: Միջոցառմանը մասնակցում էին Թբիլիսիի բուհերում սովորող Ջավախքի ուսանողները և Վիրահայոց թեմի երիտասարդական բաժնի ու «Հայարտուն» կրթա-մշակութային և երիտասարդական կենտրոնի ակտիվիստները:

2016 թվականի ապրիլի 20-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ Թեմի «Սուրբ Մովսես Խորենացի» նախակրթարանի Սուրբ Զատիկին նվիրված տոնահանդես: Օրվա խորհրդին պատշաճ զարդարված դահլիճում տեղեր էին զբաղեցրել հոգևոր ծառայողները, «Հայարտուն» կենտրոնի աշխատակազմը, ծնողներ, հյուրեր:

2016 թվականի ապրիլի 16-17-ին, Վրաստանի մայրաքաղաքում հյուրընկալվեցին մարզական պարերի միջազգային օլիմպիադայի մասնակից 12 երկրների ներկայացուցիչներ: Օլիմպիադայի շրջանակներում Թբիլիսիի նորաբաց Սպորտի դահլիճում մարզական և ազգային ոգեշունչ պարերը ներկայացրեցին ինչպես տարբեր երկրներից ժամանած, այնպես էլ տեղի պարային համույթները և անհատ կատարողները: Օլիմպիադայի նպատակն էր երիտասարդ սերնդի շրջանում առողջ, մարզական և մշակութային կենսաձևի արմատավորումը և կանանց մարզական խմբերին աջակցությունը: