2013 թվականի նոյեմբերի 7-ին մեկնարկեց երիտասարդության մտավոր և հոգևոր զարգացման Ծրագիրը, որը կազմակերպել է Համայն Վրաստանի Կաթողիկոս-պատրիարքի միջազգային բարեգործական հիմնադրամին կից մտավոր-ճանաչողական ստուդիան: Համայն Վրաստանի կաթողիկոս-Պատրիարքի հիմնադրամի հրավերով, Ծրագրին մասնակցում են Վիրահայոց թեմի 5 երիտասարդ ներկայացուցիչներ: Նրանք են Լիզա Թորոսյան, Անի Ղուշչյան, Լաուրա Մզիկյան, Մարիամ Սարկիսովա և Վալենտինա Գալեչյան:

Թբիլիսիում տեղի ունեցած կրթական հաղորդակցության միջազգային տոնավաճառին մասնակցության նպատակով Երևանից ժամանած Հայաստանի ամերիկյան համալսարանի պատվիրակության այցելության ծրագրի մեջ ընդգրկված էր նաև հանդիպումը թբիլիսահայ ապագա դիմորդների հետ: Սույն թվականի նոյեմբերի 3-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում տեղի ունեցավ վերոհիշյալ հանդիպումը:Հայաստանի ամերիկյան համալսարանի ընդունելության հարցերի գրասենյակի համակարգող Կարինե Սաթամյանը, հաղորդակցության ծառայության ներկայացուցիչ Տաթևիկ Վարդանյանը և տնտեսագիտության ֆակուլտետի ամբիոնի վարիչ Վահրամ Ղուշչյանը ներկաներին հանգամանալից ներկայացրեցին այս բուհում տարվող կրթական մեթոդոլոգիայի, ուսումնական ծրագրերի, միջազգային դիպլոմի առավելությունները: Արևմտյան ոճի կրթական ծրագրերով գործող Հայաստանի ամերիկյան համալսարանը ԱՄՆ-ում հավատարմագրված , ՀՀ պետության կողմից ճանաչված, բազմակողմանի կրթություն ապահովող բարձրագույն ուսումնական հաստատություն է: Համալսարանը բավարարում է արևմտյան միջազգային կրթության բոլոր չափանիշները, ճանաչված է տարածաշրջանում , ունի բակալավրի քառամյա ծրագրեր, ինչպես նաև մագիստրոսի ութ ծրագիր:

2013թ. հոկտեմբերի 24-ից 28-ը Վիրահայոց թեմի ուխտավորների խումբը՝ հովանավորությամբ ՀՀ Սպորտի և երիտասարդության հարցերի նախարարության և ղեկավարությամբ ու օրհնությամբ Վիրահայոց թեմի առաջնորդ Գերաշնորհ Տ. Վազգեն եպիսկոպոս Միրզախանյանի, ճանաչողական և համագործակցության այցով գտնվում էր Հայաստանում և Արցախում: Ուխտագնացությունը կազմակերպել էր Վիրահայոց թեմի Երիտասարդության հարցերով բաժինը՝ գլխավորությամբ բաժնի տնօրեն Գևորգ սրկ. Անտոնյանի: Ուխտավորների կազմում էին Վիրահայոց թեմի աշխատակիցները, երիտասարդներ Թբիլիսիից, Ախալցիխեից, Բաթումից և Մառնեուլիից: Ուխտավորների մեջ էր նաև   ճանաչված ամերիկահայ բանաստեղծուհի Սոնա Վանը:  

Սուրբ Ավետարանիչների՝ Մատթեոսի, Մարկոսի, Հովհաննեսի և Ղուկասի տոնի օրը Թբիլիսիի Սուրբ Էջմիածին եկեղեցու հավատացյալները՝ առաջնորդությամբ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի, եղան Մառնեուլիի շրջանի Շահումյան գյուղի Սուրբ Աստվածածին եկեղեցում, որտեղ կատարվում են վերանորոգչական աշխատանքներ: Եկեղեցում, հավատացյալների մասնակցությամբ, կատարվեց գոհաբանական աղոթք, ապա հավատացյալներն իրենց աղոթքը բարձրացրեցին եկեղեցու շուտափույթ վերանորոգության ակնկալիքով: