Նոյեմբերի 23-ին, Վիրահայոց թեմի «Հայարտուն» կենտրոնում կայացավ դասական երաժշտության համերգ-դասախոսություն: Միջոցառումը նախաձեռնել էր Վրաստանի հայ երաժիշտների միությունը Վիրահայոց թեմի «Հայարտուն» կենտրոնի աջակցությամբ: Կենտրոնի Գալուստ Գյուլբենկյան սրահում տեղեր էին զբաղեցրել տարբեր ազգերի երաժիշտներ, օպերային երգչուհի-երգիչներ, դասական երաժշտության մասնագետներ: Երեկոն նաև ստեղծագործական էր, քանզի այն ընթացավ հայտնի դաշնակահար, Թբիլիսիի Վանո Սարաջիշվիլու անվան պետական երաժշտանոցի պրոֆեսոր Վիտալի Քամալովի դաշնամուրային հիասքանչ նվագակցության ներքո:

Նոյեմբերի 20-ին, Միջազգային կանանց ասոցիացիայի (Վրաստան) անդամները հյուրընկալվեցին Վիրահայոց թեմի «Հայարտուն» կենտրոնում: Միջոցառումն իրականացավ ասոցիացիայի անդամներ՝ Վրաստանում ՀՀ դեսպանի տիկին Արմինե Մանուկյանի և փոխդեսպանի տիկին Լուսինե Աֆյանի նախաձեռնությամբ և աջակցությամբ, Վրաստանում հայ կանանց «Շուշանիկ» միության հետ համագործակցությամբ: Կենտրոնի Գալուստ Գյուլբենկյան սրահ ժամանեցին ասոցիացիայի ղեկավար խորհրդի նախագահ Մարթա Ֆերեր Լյուբեքը, խորհրդի անդամ Նանա Դվալին, Գվանցա Ժուրուլին, Բենգյու Աքչարդաք Քյուչուքը, ասոցիացիայի մյուս անդամները: Հյուրընկալությանը ներկա էին Վրաստանում ՀՀ դեսպանության դիվանագետների տիկնայք, «Շուշանիկ» միության անդամներ, Գարի Դավթյան տիկնիկային մշակույթի տան տնօրեն Ժաննա Դավթյանը, «Հայարտուն» կենտրոնի աշխատակիցներ, հյուրեր: Մանրանկարիչներ Գոհար Հակոբյանի, Մերուժան Շահումյանի մանրանկարչական աշխատանքները, նկարչուհի Իռենա Օհանջանովայի ձեռքով պատրաստված զարմանահրաշ տիկնիկները և Միլենա Կվաճանտիրաձեի երևակայությամբ հավաքված զարդերը ուղղակի գերեցին ներկաներին:

2013 թ. նոյեմբերի 14-15-ին Թբիլիսիի Իվանե Ջավախիշվիլու անվան պետական համալսարանում տեղի ունեցավ գիտական կոնֆերանս՝ նվիրված պրոֆեսոր, արևելագետ Լևոն Մելիքսեթ-Բեգի հիշատակին: Կոնֆերանսը նախաձեռնել էր համալսարանի Արևելագիտության ինստիտուտը:

Նոյեմբերի 18-ին Ջավախքի ընդհանուր առաջնորդական փոխանորդության «Պուրպիկ» տիկնիկային թատրոնը հանդես եկավ Ախալքալաքի շրջանի Կուլիկամ գյուղի դպրոցում:
Արթուր Ղարիբյանի անվան հայկական հանրակրթական  դպրոցի աշակերտները և գյուղի փոքրիկները հնարավորություն ունեցան դիտելու «Պուրպիկ»-ի դերասանների կատարողական բարձր արվեստը: