რელიგიის საკითხთა სახელმწიფო სააგენტოს 2015 წლის ანგარიშის მიხედვით, რელიგიური უმცირესობებისთვის საბჭოთა პერიოდში ჩამორთმეული საკულტო დანიშნულების შენობა-ნაგებობების დაბრუნების კუთხით, 2015 წელს საქართველოს მუსლიმ თემს დაუბრუნდა აჭარაში მდებარე 35 მეჩეთი (2014 წლის ჩათვლით დაბრუნებულია სულ 79 მეჩეთი მთელი საქართველოს მასშტაბით), ხოლო საქართველოს ებრაულ თემს - 5 სინაგოგა (2014 წლის ჩათვლით დაბრუნებულია სულ 12 სინაგოგა მთელი საქართველოს მასშტაბით).

2015 წელს ასევე გორში მდებარე შენობა-ნაგებობა გადაეცა საქართველოს ევანგელურ-პროტესტანტულ ეკლესიას.
როგორც სააგენტოს ანგარიშშია მოცემული, რელიგიური უმცირესობების ქონებრივი საჭიროები განიხილეს სარეკომენდაციო კომისიის ფარგლებში. მათი ინფორმაციით:
„სრულიად საქართველოს მუსლიმთა სამმართველოს გადაეცა ორი შენობა ბათუმში სამუფთო რეზიდენციისა და უმაღლესი მუსლიმური საღვთისმეტყველო სასწავლებლის მოსაწყობად.
გაიცა რეკომენდაცია ბათუმში მოქმედი ცენტრალური მეჩეთის  - „ორთა ჯამეს“ რესტავრაცია-რეკონსტრუქციისა და გაფართოების შესახებ.
გაიცა დადებითი რეკომენდაცია რუსთავში საქართველოს ევანგელურ-პროტესტანტულ ეკლესიის საკულტო ნაგებობის მშენებლობა-რესტავრაციის შესახებ.
სომეხთა სამოციქულო მართლმადიდებელი წმინდა ეკლესიის საქართველოს ეპარქიას გადაეცა მიწის ნაკვეთი ბათუმში რელიგიურ - საგანმანათლებლო ცენტრის მშენებლობის მიზნით.
გაიცა დადებითი რეკომენდაცია თბილისში იეზიდთა საკულტო და კულტურული დანიშნულების შენობა-ნაგებობების მშენებლობის შესახებ.
გაიცა დადებითი რეკომენდაცია თბილისის სახარების ქრისტიან ბაპტისტთა ქრისტე მაცხოვრის ეკლესიისთვის თბილისში საკულტო დანიშნულების შენობა-ნაგებობების მშენებლობის შესახებ.
აჭარაში შესაბამის უწყებებთან განხორციელდა საკონსულტაციო შუამდგომლობა ბათუმში მდებარე საქართველოს სახარებისეულ ქრისტიან ბაპტისტთა ქრისტიანული ეკლესიის საკულტო დანიშნულების შენობა-ნაგებობის დაკანონების მიზნით.
თბილისში შესაბამის უწყებებთან განხორციელდა საკონსულტაციო შუამდგლომლობა თბილისში საერთაშორისო ბაპტისტური ეკლესიისთვის თბილისში საკულტო დანიშნულების შენობა-ნაგებობების მშენებლობის ნებართვის მოპოვების მიზნით", - ნათქვამია ანგარიში.