საქართველოს სომეხთა ეპარქიის „ჰაიარტუნ“ ცენტრის გალუსტ გიულბენკიანის სახელობის დარბაზში მიმდინარე წლის 24 დეკემბერს გაიმართა „სურბ მოვსეს ხორენაცი“ საბავშვო ბაღის (ხელმძღვანელი: ევგენია მარკოსიანი) საახალწლო ზეიმი. საბავშვო ბაღის მასწავლებლების ძალისხმევით და ფანტაზიით მორთული დარბაზი ნამდვილი ზამთრის შთაბეჭდილებას ტოვებდა, სადაც სხვადასხვა ცხოველების, ანგელოზებისა და ფიფქიების მსგავსი საბავშვო ბაღის 50-ზე მეტი აღსაზრდელი ელოდა თოვლის ბაბუას, რომელსაც უნდა ეხარებინა ახალი - 2015 წლის დაწყება.

საზეიმოდ მორთულ დარბაზში ადგილები ეკავათ არა მხოლოდ პატარების მშობლებს, ბებიებსა და ბაბუებს, არამედ სულიერ მამებს, „ჰაირტუნ“ ცენტრისა და ეპარქიის თანამშრომლებს. ღონისძიებას ესწრებოდნენ სრ საელჩოს დიპლომატები კარენ მელიქიანი და ტიგრან თუმანიანი.

ზეიმი დაიწყო „მამაო ჩვენოთი“ და საქართველოს სომეხთა ეპარქიის წინამძღვრის, მისი ყოვლადუსამღვდელოესობის ეპისკოპოს ვაზგენ მირზახანიანის კურთხევით. საქართველოს სომეხთა ეპარქიის კულტურის განყოფილების დირექტორმა, „ჰაიარტუნ“ ცენტრის კოორდინატორმა ლევონ ჩიდილიანმა მადლობა გადაუხადა ყველა იმ მშობელს, რომლებმაც აირჩიეს სომხური საბავშვო ბაღი, სომხური აღზრდა-განათლება.

 ერთიმეორის მიყოლებით გამოდიოდნენ პატარები ლამაზი და სწორი სომხური სიტყვით, მხიარული სიმღერებითა და ცეკვით, ლექსებით, გამოცანებით, ენის გასატეხებით. ბავშვების სწორი ქცევა, გამართული სიტყვა, ლამაზი სიმღერა და ცეკვა გახდა იმის დასტური, რომ საბავშვო ბაღმა თავის მოღვაწეობაში სწორად შეარჩია განვითარების გზა. აღსაზრდელთა გამოსვლებით კმაყოფილმა ზღაპრულმა ქაჯ ნაზარმა და თოვლის ბაბუამ ზეიმის დასასრულს პატარებს საახალწლო საჩუქრები დაურიგეს.

მშობლების სახელით საბავშვო ბაღის აღმზრდელებსა და საქართველოს სომეხთა ეპარქიის წინამძღვარს მადლიერების სიტყვით მიმართა მშობელმა გაიანე ბოსტანჯიანმა, რომელმაც დამსწრეებს მოუწოდა, რომ შვილებს მშობლიურ ენაზე აღზრდა-განათლება მისცენ.

ღონისძიების ბოლოს მადლიერების სიტყვაში საქართველოს სომეხთა ეპარქიის წინამძღვარმა მისმა ყოვლადუსამღვდელოესობამ ეპისკოპოსმა ვაზგენ მირზახანიანმა ყურადღება გაამახვილა დარბაზის მორთვასა და ბავშვების გარეგნობაზე, რაც ყოველ ჯერზე ახლებურად გვევლინება. ხაზი გაუსვა რა სულიერი ტაძრის როლს ეროვნულობის შენარჩუნებისა და თაობებისათვის გადაცემის საქმეში, მისმა უსამღვდელოესობამ აქტუალობა მიანიჭა სახელმწიფო სკოლის გვერდით ასევე ეროვნული სკოლის ქონის საკითხს. ეპარქიის წინამძღვარმა დააფასა საბავშვო ბაღის მასწავლებლების, ყველა თანამშრომლის თავდაუზოგავი მუშაობა და დამსწრეებს მოუწოდა, რომ იყონ ეკლესიის გვერდით, დაესწრონ წირვა-ლოცვებსა და საეკლესიო ცერემონიებს. ეპისკოპოსმა ვაზგენ მირზახანიანმა დამსწრეებს მიულოცა დამდეგი ახალი წელი და შობის ბრწყინვალე დღესასწაული და ყველა მიიწვია შობისა და ნათლისღების ცერემონიებში მონაწილეობის მისაღებად.