2018 წლის პირველ აპრილს, ჩვენი უფლის  იესო ქრისტეს ბრწყინვალე აღდგომის დღესასწაული საქართველოს სომეხთა ეპარქიაში   აღნიშნა უამრავი  მორწმუნის მონაწილეობით და სომეხთა ეკლესიის კანონიკისა და ცერემონიების შესაბამისად.   როგორც „ჭრაგალუიცის“ საღამოს, წმინდა აღდგომის დღესაც თბილისში,   ბათუმში, სამცხე-ჯავახეთში, მარნეულის, წალკის და თეთრიწყაროს რაიონებში მრევლის მონაწილეობით შესრულდა წმინდა ცერემონიები.
მორწმუნეებით სავსე იყო თბილისის ავლაბრის „სურბ ეჯმიაწინ“ ეკლესია, ეკლესიის ეზო და   მიმდებარე ტერიტორია. ეკლესიაში ჩატარდა ღვთისმსახურება, შემდეგ საქართველოს სომეხთა ეპარქიის წინამძღვარმა,  მისმა ყოვლადუსამღვდელოესობამ, ეპისკოპოსმა  ვაზგენ მირზახანიანმა ჩვენი უფლის იესო ქრისტეს ბრწყინვალე აღდგომის დღეს საღმრთო ლიტურგია აღავლინა. საღმრთო ლიტურგიას ესწრებოდა საქართველოში სომხეთის  საგანგებო და სრულუფლებიანი ელჩი რუბენ სადოიანი, საელჩოს დიპლომატები,   პოეტი და მთარგმნელი გივი შაჰნაზარი, გაზეთ „ვრასტანის“ რედაქტორი ვან ბაიბურთიანი, სათემო მოღვაწეები, განათლებისა და კულტურის მოღვაწეები, უამრავი მორწმუნე.   
სომეხთა ეკლესიაში ბრწყინვალე აღდგომის დღესასწაულს ესწრებოდნენ და ყველას მიულოცეს დღესასწაული საქართველოს ხელისუფლების წარმომადგენლები, კერძოდ,   თბილისის მერი კახი კალაძე, საკრებულოს წევრი ილია ჯიშკარიანი,საქართველოს    პარლამენტის წევრები დავით ჭიჭინაძე, რუსლან პოღოსიანი, რომან კაკულია, სერგო რატიანი, გიგა ბოკერია, ნაციონალური მოძრაობის წევრი  ზაალ უდუმაშვილი,ისნის რაიონის გამგებელი კახა ლაბუჩიძე და სხვები.   
საღმრთო ლიტურგიის დროს მწირველმა მეუფემ წაიკითხა სრულიად სომეხთა კათოლიკოსის უწმინდესის და უნეტარესის გარეგინ მეორის სააღდგომო მოლოცვა.
საღმრთო ლიტურგიის დასასრულს, ეპარქიის წინამძღვარმა  მორწმუნეებს მიულოცა წმინდა აღდგომის  - როგორც სიკეთის ბოროტებაზე, სინათლის წყვდიადზე გამარჯვების დღესასწაული.
შემდეგ საქართველოს სომეხთა ეპარქიის  "ჰაიარტუნ" ცენტრის გალუსტ გიულბენკიანის სახელობის დარბაზში გაიმართა მიღება, რომლის დროსაც მეუფე ვაზგენმა კიდევ ერთხელ მიულოცა დამსწრეებს ბრწყინვალე აღდგომის დღესასწაული. მისმა ყოვლადუსამღვდელოესობამ მიულოცა   საქართველოს ქრისტიანებს, რომლებიც დღეს   ზეიმობენ ბზობას.
საზეიმო მიღების შემდეგ საქართველოს სომეხთა ეპარქიის წინამძღვარი  მისი ყოვლადუსამღვდელოესობა ეპისკოპოსი ვაზგენ მირზახანიანი გაემგზავრა ჯავახეთში -   ნინოწმინდის რაიონის სოფელ სათხაში, სადაც   ერის ღირსეული შვილების მიერ დიდი პომპეზობით აღინიშნება სააღდგომო  დღესასწაული.
იესო ქრისტეს აღდგომის დღესასწაულზე საღმრთო ლიტურგია აღევლინა საქართველოს სომეხთა ეპარქიის მოქმედ ეკლესიებში. ყველგან  სომეხი მორწმუნეების მოსალოცად იყვნენ მოსული საქართველოს ხელისუფლების წარმომადგენლები, სხვადასხვა ეროვნების მორწმუნეები. აღდგომის დღესასწაული, რომელიც აღინიშნა სომხური საეკლესიო კალენდრით, გაშუქდა     სხვადასხვა ქართულ და სომხურ  მასობრივი ინფორმაციის საშუალებით.