საქართველოს სომეხთა ეპარქიის წინამძღვრის ლოცვა-კურთხევითა და მფარველობით და საქართველოს მწერალთა კავშირის ინიციატივით, კითხვის მოყვარულ საზოგადოებას წარედგინა ცნობილი ქართველი პოეტის, იოსებ გრიშაშვილის, „ძველი თბილისის ლიტერატურული ბოჰემა" წიგნის ხელახალი გამოცემა, ილუსტრირებული ცნობილი სომეხი მხატვრის, რობერტ კონდახსაზოვის მიერ.

იდეა მრავალეროვანი კოლორიტული ქალაქისადმი ქართველი მწერლისა და სომეხი მხატვრის დიდი სიყვარულია. როგორც იოსებ გრიშაშვილისთვის იყო სანუკვარი თბილისის ლიტერატურული ცხოვრება, ასევე რობერტ კონდახსაზოვის ნამუშევრების პირველადი თემა ძველი თბილისის გამოსახულებები იყო. ცხოვრების ბოლო წლები მხატვარმა საზღვარგარეთ გაატარა, და ნიშნად თბილისისადმი უსაზღვრო სიყვარულისა და ნოსტალგიისა, შეასრულა იოსებ გრიშაშვილის წიგნის - „ძველი თბილისის ლიტერატურული ბოჰემა", ილუსტრაციები. მხატვრის ოცნება - ამ ყველაფრის წიგნად ხილვისა, დარჩა ოცნებად, ხოლო წიგნი დაიბადა და მიაღწია მკითხველამდე.

2016 წლის 5 ნოემბერს, საქართველოს სომეხთა ეპარქიის „ჰაიარტუნ“ ცენტრის გალუსტ გიულბენკიანის სახელობის დარბაზში გაიმართა იოსებ გრიშაშვილის წიგნის - "ძველი თბილისის ლიტერატურული ბოჰემა" პრეზენტაცია, რომლის პარალელურად გაიმართა მხატვარ რობერტ კონდახსაზოვის ნამუშევართა პერსონალური გამოფენა, რომელიც შეესაბამებოდა წიგნში განთავსებულ ნახატებს.

დარბაზშიი ხალხმრავლობა იყო. ღონისძიებას ესწრებოდნენ სომეხი და ქართველი მწერლები, ხელოვნების მოყვარული საზოგადოების წარმომადგენლები. პრეზენტაციასა და პერსონალურ გამოფენაზე დასასწრებად რუსეთიდან სპეციალურად იყო ჩამოსული კონდახსაზოვის ქალიშვილი - დინა კონდახსაზოვა, ქალიშვილთან ერთად . სტუმრებს შორის იყვნენ საქართველოს რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე, საქართველოს პრეზიდენტის მრჩეველი ეროვნებათშორისი ურთიერთობების საკითხებში სოფიო შამანიდი, სომხეთის რესპუბლიკაში საქართველოს საგანგებო და სრულუფლებიანი ელჩის, გიორგი საგანელიძის, მეუღლე ქალბატონი ეკა ბაქრაძე და სხვები.

ღონისძიება გახსნა საქართველოს სომეხთა ეპარქიის „სურბ ეჯმიაწინ“ ეკლესიის სულიერმა მოძღვარმა მღვდელმა ვირაპ ღაზარიანმა, ვინც საქართველოს სომეხთა ეპარქიის წინამძღვრის, მისი ყოვლადუსამღვდელოესობის ეპისკოპოს ვაზგენ მირზახანიანის კურთხევა და მფარველობა გადასცა პრეზენტაციის მონაწილეებს და განუმეორებელი კოლორიტული სურნელის მქონე თბილისისადმი ქართველი მწერლისა და სომეხი მხატვრის სიყვარულის მტკიცებულება უწოდა ამ ნამდვილად ღირებული წიგნის ხელახალ გამოქვეყნებას.

საქართველოს მწერალთა კავშირის თავმჯდომარემ, წიგნის ხელახალი გამოცემის იდეის ავტორმა, ქალბატონმა მაყვალა გონაშვილმა, ღონისძიებას უწოდა სიყვარულის საღამო, ვინაიდან დარბაზში დანავარდობდა თბილისის სხვადასხვა ეროვნების მოქალაქეების სიყვარული და ერთგულება საყვარელი ქალაქისადმი. ქალბატონმა მაყვალა გონაშვილმა გააჟღერა საქართველოს მწერალთა კავშირის გადაწყვეტილება -  რობერტ კონდახსაზოვის მეუღლის, ვიქტორია ზინინასათვის, ნაყოფიერი მთარგმნელობითი მოღვაწეობისათვის,  ივანე მაჩაბელის სახელობის პრემიის მინიჭების შესახებ.

ამაღელვებელი იყო მხატვრის ქალიშვილის გამოსვლა. მან მადლობა გადაუხადა საქართველოს სომეხთა ეპარქიას და მის წინამძღვარს, საქართველოს მწერალთა კავშირსა და მის თავმჯდომარეს, საქართველოს სომეხ მხატვართა კავშირს და "ჰაიარტუნ" ცენტრს, ყველა კოლექციონერს, ვინაიდან ერთხელ კიდევ დადასტურდა, რომ მხატვარი რობერტ კონდახსაზოვის მოგონებები და ხსოვნა ცხოვრობს ქალაქ თბილისში.

ღონისძიების გამომსვლელებმა - პოეტმა და მთარგმნელმა გივი შაჰნაზარმა, საქართველოს სომეხ მხატვართა კავშირის თავმჯდომარე ირენ ოჰანჯანოვამ, პოეტმა, თარჯიმანმა ანაჰიტ ბოსტანჯიანმა, პოეტმა მზია ხეთაგურმა, ხელოვნებათმცოდნე დავით ანდრიაძემ და სხვებმა გამოსვლებში ხაზი გაუსვეს ლიტერატურულ კავშირებს, რომლებიც ჩამოყალიბდა სომხურ-ქართული მრავალსაუკუნოვანი მეგობრობით, გაძლიერდა, განვითარდა და გაღრმავდა ორი ხალხების მთარგმნელ-შემოქმედთა თარგმანებით, შემოქმედებითი სამყაროს წარმომადგენელთა პატიოსანი ურთიერთობებით, რითაც ისინი იქცნენ ორი ხალხების დამაკავშირებელ ხიდად და გააგრძელეს ერის ღირსეული შვილების მეგობრობა და თანამშრომლობა.

დედაქალაქის 131-ე საჯარო სკოლის მასწავლებელმა მანანა კარაპეტიანმა წაიკითხა ქართველოლოგ, ფილოლოგიის მეცნიერებათა კანდიდატ ჰრაჩია ბაირამიანის მიმართვა. აქვე დავსძენთ, რომ გამოსაქვეყნად მზადდება იოსებ გრიშაშვილის „ძველი თბილისის ლიტერატურული ბოჰემა" წიგნის სომხური ვერსია, ჰრაჩია ბაირამიანის თარგმანით.

პრეზენტაციის დროს ნაჩვენები იქნა რობერტ კონდახსაზოვის ნახატების სლაიდ-შოუ. ღონისძიების დროს ჟღერდა კლასიკური მუსიკის ნიმუშევრები ფორტეპიანოზე ესაი აბოვიანის შესრულებით და ქალაქური სიმღერები "ჰაიარტუნ" ცენტრის დოლისა და დუდუკის ჯგუფის აღსაზრდელების შესრულებით.