ՆԱՏՕ-ի և Եվրամիության մասին տեղեկատվական կենտրոնի հետ Վիրահայոց թեմի երիտասարդական բաժնի (տնօրեն՝ Վալերի Բադալյան) համագործակցության շրջանակներում, 2016 թվականի հոկտեմբերի 12-ին, կազմակերպվեց հայ ակտիվիստ երիտասարդների այցը տեղեկատվական կենտրոն, ի մասնավորի՝ ՆԱՏՕ-ի գլխավոր քարտուղար Յենս Սթոլթենբերգի Վրաստան այցի օրերին բացված նոր շենք: Հայ երիտասարդների խմբին՝ բաժնի ծրագրերի համակարգող Նինա Սերոպովայի և Խաղաղության հիմնադրամի նախագահ Գիորգի Թումասյանի առաջնորդությամբ, դիմավորեց Տեղեկատվական կենտրոնի տնօրեն Քեթի Չաչավան: Տնօրենը կարևորեց թեմի երիտասարդական բաժնի հետ կենտրոնի համագործակցությունը և խոսեց ապագա ծրագրերի մասին: Այնուհետև խումբը դեպարտամենտի տնօրենի առաջնորդությամբ, շրջայց կատարեց նորաբաց կենտրոնում, ծանոթացավ կենտրոնի կառուցվածքային գործունեությանը:

2016 թվականի հոկտեմբերի 9-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում բացվեց ՀՀ նկարիչների միության անդամ Մարտիրոս Ելագյանի գեղանկարչական և գրաֆիկական աշխատանքների ցուցահանդեսը:

2016 թվականի հոկտեմբերի 6-ին, Թբիլիսիի Սուրբ Գևորգ առաջնորդանիստ եկեղեցու առաջնորդարանում հյուրընկալվեց Վրաստանի հայտնի պետական և հասարակական գործիչ, ճանաչված մտավորական Վիկտորյա Սիրաձեն: Նախկին կուսակցական բարձրպաշտոնյային ուղեկցում էին «Վրաստան» թերթի խմբագիր Վան Բայբուրթյանը և ակտիվ հասարակական գործիչ Արտեմ Կիրակոզովը:

2016 թվականի հոկտեմբերի 9-ին, Թբիլիսիի Սուրբ Գևորգ առաջնորդանիստ եկեղեցում, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հանդիսապետությամբ մատուցվեց կիրակնօրյա Սուրբ և Անմահ Պատարագ: