Մարտի 9-ին՝ Սեբաստացի սուրբ քառասուն մանկանց հիշատակության օրը, Թբիլիսիի Հավլաբարի Սուրբ Էջմիածին եկեղեցում մատուցվեց Սուրբ Պատարագ:

Պատարագիչ քահանան հիշատակեց 4-րդ դարի սկզբին նահատակված 40 վկաներին, ովքեր Փոքր Հայքի տարբեր քաղաքներից էին և զինվորական ծառայության մեջ էին Սեբաստիա քաղաքի կայսերական գնդում:

Վրաստանի հայ կանանց «Շուշանիկ» միության նախաձեռնությամբ և Վիրահայոց Թեմի «Հայարտուն» մշակույթի կենտրոնի աջակցությամբ, մարտի 7-ին կենտրոնի Գալուստ Գյուլբենկյան սրահում կայացավ վիրահայ կանանց ձեռքի աշխատանքների ցուցահանդես-վաճառք: Միջոցառումը նվիրված էր Կանանց միջազգային օրվան՝ Մարտի 8-ին: Ցուցադրվել էին երկու տասնյակ կին-մասնակիցների ձեռքով պատրաստած ասեղնագործության, գորգագործության, գոբելենի նմուշներ, հարսանեկան տարոսիկներ, կանացի զարդեր և այլն:

«Հայկական գաթա» փառատոն Ջավախքում Մարտի 6-ին Մեծ պահքի Միջինքի օրը Վիրահայոց թեմի Ջավախքի առաջնորդական փոխանորդության նախաձեռնությամբ Ախալքալաքի Սուրբ Խաչ եկեղեցում առաջին անգամ նշվեց «Հայկական Գաթա» փառատոնը: Փառատոնն ազդարարվեց տերունական աղոթքով, որից հետո Ջավախքի ընդհանուր առաջնորդական փոխանորդ Հոգեշնորհ՝ Տեր Բաբգէն աբեղա Սալբիյանը խոսեց Մեծ պահքի և Միջինքի մասին: Հայր Սուրբը իր խոսքում վստահություն հայտնեց, որ բոլոր հայ ընտանիքներում թխվում են գաթաներ, սակայն շատերը նույնիսկ չգիտեն, թե ինչ է նշանակում գաթա, որտեղից է գալիս այն: Միաժամանակ ավելացրեց. «Առաջին անգամ է Ջավախքում անցկացվում «Հայկական գաթա» փառատոնը, որը բարի սկիզբ է ապագայի համար: Մենք պետք է դիմենք միջազգային կազմակերպություններին, որ շատ ու շատ այլ կերակրատեսակների հետ միասին գաթան անցկացնեն Յունեսկոյի գրքի մեջ՝ որպես հայկական ուտեստ»:

Թբիլիսիի Հավլաբարի Սուրբ Էջմիածին եկեղեցում նշանավորվեց Մեծ պահքի 24-րդ օրը, որը հայտնի է «Միջինք» անունով: Հավատացյալներով լեփ-լեցուն եկեղեցում տեղի ունեցավ երեկոյան խաղաղական և հանգստյան ժամերգություն: Հավարտ ժամերգության հոգևոր հայրերի կողմից հանդիսավոր կերպով օրհնվեց ավանդական «Միջինքի» գաթան և այն «Հայարտուն» մշակույթի տան «Անի» համույթի սաների ձեռքով բաժանվեց հավատացյալներին: