მიმდინარე წლის 4 დეკემბერს, საქართველოში სომხეთის რესპუბლიკის საგანგებო და სრულუფლებიანი ელჩი ბატონი იური ვარდანიანი, საქართველოს სომეხთა ეპარქიის წინამძღვართან, მის ყოვლადუსამღვდელოესობა ეპისკოპოს ვაზგენ მირზახანიანთან ერთად ეწვია სამცხე-ჯავახეთის მხარეს. ეს ბატონი ვარდანიანის პირველი ვიზიტი იყო სომხებით დასახლებულ რეგიონში და მას ჰქონდა გაცნობითი ხასიათი. ელჩს თან ახლდა საქართველოში სრ კონსული ანაიტ ბარსეღიანი და ელჩის მრჩეველი კარენ მელიქიანი.

ქალაქ ახალციხის მისადგომებთან სომხეთის რესპუბლიკის ელჩს და მისი ხელმძღვანელობით დელეგაციას დახვდნენ საქართველოს სომეხთა ეპარქიის სამცხე-ჯავახეთისა და წალკის საერთო ეპარქიალური ვიკარიატის ვიკარიუსი არქიმანდრიტი ბაბგენ სალბიანი, ახალციხის საქალაქო და რაიონული საკრებულოების ეთნიკურად სომეხი დელეგატები, სათვისტომოს აქტივისტები, ადგილობრივ სამღვდელოებასთან ერთად.

სამხარეო ადმინისტრაციაში სომხეთის ელჩი თბილად მიიღო სამცხე-ჯავახეთის გუბერნატორმა აკაკი მაჭუტაძემ, რომელმაც საუბრისას ხაზი გაუსვა სომხურ-ქართულ მეგობრობას, წარმოადგინა ჯავახეთის სომხებით დასახლებულ დასახლებებში სახელმწიფოს მიერ დაგეგმილი პროგრამები და გამოთქვა საელჩოსთან კულტურულ და ორმხრივი ინტერესის მქონე სფეროებში თანამშრომლობის მზადყოფნა.

შეხვედრას ესწრებოდა ქალაქ ახალციხის მერი გიორგი კოპაძე, მან წარადგინა ქალაქის კეთილმოწყობის სამუშაოები, მათ შორის აღნიშნა ახალციხიდან „სურბ გრიგორ ლუსავორიჩ“ ეკლესიასა და ებრაულ სინაგოგამდე მიმავალი გზის დაგების სამუშაოები, რაც განხორციელდება 2015 წელს.

საგანგებო და სრულუფლებიანმა ელჩმა იური ვარდანიანმა გუბერნატორის ყურადღება გაამახვილა ჯავახეთის სომხებისათვის საჭირბოროტო საკითხებზე.

შეხვედრის შემდეგ დელეგაცია გაემართა ახალციხის „სურბ გრიგორ ლუსავორიჩ“ ეკლესიისკენ, სადაც მათ პურითა და მარილით დახვდნენ სასულიერო პირები, ახალციხის სომხური ახალგაზრდული კულტურულ-საგანმანათლებლო ცენტრის აღსაზრდელები და სათვისტომოს წევრები.

ეკლესიაში საქართველოში სომხეთის რესპუბლიკის საგანგებო და სრულუფლებიან ელჩს ბატონ იური ვარდანიანს და საქართველოს სომეხთა ეპარქიის წინამძღვარს, მის ყოვლადუსამღვდელოესობა ეპისკოპოს ვაზგენ მირზახანიანს მიესლმა საქართველოს სომეხთა ეპარქიის სამცხე-ჯავახეთისა და წალკის საერთო ეპარქიალური ვიკარიატის ვიკარიუსი არქიმანდრიტი ბაბგენ სალბიანი. საპასუხო სიტყვაში ბატონმა ვარდანიანმა ისაუბრა დედა-სამშობლოსა და სომხურ სათვისტომოთა ურთიერთკავშირზე და უპასუხა ხალხის დასმულ შეკითხვებს.

შეხვედრის დასასრულს საქართველოში სომხეთის რესპუბლიკის საგანგებო და სრულუფლებიანმა ელჩმა ახალციხის სომხურ ახალგაზრდულ კულტურულ-საგანმანათლებლო ცენტრის კოორდინატორ ედუარდ აივაზიანს გადასცა სომხეთის რესპუბლიკის დიასპორის სამინისტროს სიგელი.

ახალციხის სომეხ ახალგაზრდებთან შეხვედრის შემდეგ მხარის გუბერნატორმა აკაკი მაჭუტაძემ ელჩი და დელეგაციის წევრები მიიწვია რაბათის ისტორიულ ციხეში. სტუმრებმა დაათვალიერეს ციხე და დაესწრნენ ახალციხისადმი მიძღვნილი ქართულ და ინგლისურ ენებზე გამოცემული ბროშურის პრეზენტაციას, სადაც საქართველოში სომხეთის რესპუბლიკის საგანგებო და სრულუფლებიანი ელჩი ბატონი იური ვარდანიანის პატივსაცემად, ადგილობრივი ხელისუფლება გაუმასპინძლდა სტუმრებს.

იმავე დღეს დელეგაცია გაემგზავრა ახალქალაქში, სადაც ადგილობრივი ხელისუფლების წარმომადგენლები, საქართველოს პარლამენტის დეპუტატის სამველ პეტროსიანის ხელმძღვანელობით ქალაქის მისადგომებთან დახვდნენ საქართველოში სრ საგანგებო და სრულუფლებიან ელჩს ბატონი იური ვარდანიანს და საქართველოს სომეხთა ეპარქიის წინამძღვარს, მის ყოვლადუსამღვდელოესობა ეპისკოპოს ვაზგენ მირზახანიანს, და დელეგაციის სხვა წევრებთან ერთად გაემგზავრნენ რაიონის საკრებულოს შენობისკენ.

აქ შეხვედრა გაიმართა საკრებულოს ხელმძღვანელობასა და რაიონის გამგეობის წევრებთან. შეხვედრას ესწრებოდნენ ახლაქალაქის საკრებულოს თავმჯდომარე ჰამლეტ მოვსისიანი, რაიონის გამგეობის თავმჯდომარე ედვარდ აღასარიანი და სხვა თანამდებობის პირები. შეხვედრის მონაწილეებმა წამოჭრეს საქართველოს სახელმწიფო სანომრე ნიშნებით ავტომანქანების სომხეთში შესვლის დროს შექმნილი დაბრკოლებების, სრ-ში სამედიცინო გამოკვლევის და მკურნალობის მიღების თანასწორობის, საქართველოს მოქალაქეობა ჩამორთმეულ სომხეთის რესპუბლიკის მოქალაქეთა საკითხები და სხვა.

ელჩმა იური ვარდანიანმა ყურადღებით მოუსმინა მათ და დაჰპირდა დასმული საკითხების საქართველოსა და სომხეთის რესპუბლიკის შესაბამის ორგანოთათვის გადაცემას, პრობლემათა გადასაჭრელად.

შემდეგ დელეგაციის წევრები ეწვივნენ ახალქალაქის „სურბ ხაჩ“ ეკლესიას, სადაც სასულიერო პირებთან ერთად სტუმრებს დახვდნენ ახალქალაქის ინტელიგენციისა და სომხური სათვისტომოს წარმომადგენლები და სოფელ ვაჩიანის ქორეოგრაფიული ანსამბლი, ლამაზი შესრულებებით.

სამცხე-ჯავახეთისა და წალკის საერთო ეპარქიალური ვიკარიატის ვიკარიუსის არქიმანდრიტ ბაბგენ სალბიანის მისასალმებელი სიტყვის შემდეგ სიტყვით გამოვიდა საგანგებო და სრულუფლებიანი ელჩი იური ვარდანიანი. მან მადლობა გადაუხადა ხალხს და ხელისუფლებას თბილი მიღებისა და მათთვის საჭირბოროტო საკითხების შესახებ გულწრფელი საუბრისათვის.

იმავე დღეს, საღამოთი დელეგაცია ესტუმრა ნინოწმინდას, სადაც მას დახვდნენ ადგილობრივი ხელისუფლების ორგანოთა წარმომადგენლები, საქართველოს პარლამენტის დეპუტატის ჰენზელ მკოიანის ხელმძღვანელობით.

რაიონის გამგეობის შენობაში გამართული ხანმოკლე შეხვედრის შემდეგ სტუმრები ეწვივნენ 1915 წლის სომეხთა გენოციდის მსხვერპლთა ხსოვნის მემორიალს, შემდეგ ადგილობრივი განათლების, კულტურის, სპორტის სფეროს წარმომადგენლებთან შეხვედრა გაიმართა რაფაელ ჯავახ საგანმანათლებლო-კულტურულ ცენტრში.

შეხვედრას ესწრებოდნენ დეპუტატი ჰენზელ მკოიანი და რაიონის გამგებელი გაგიკ კარსლიანი. სტუმრების წარდგენის და მისასალმებელი სიტყვის შემდეგ ნინოწმინდის რაიონის კულტურის განყოფილების გამგემ და რაფაელ ჯავახ საგანმანათლებლო- კულტურული ცენტრის დირექტორმა ჟორა სნხჩიანმა ხალხისათვის საჭირბოროტო საკითხებზე ისაუბრა. დამსწრეებმა ისაუბრეს საჯარო ბიბლოეთეკების სომხეთში გამოცემული წიგნებით მომარაგების, ჯავახეთის თვითმმართველობის ორგანოებში მიმდინარე ატესტაციის დაძლევის საკითხებზე, რაც აწუხებს ხალხს.

ელჩმა უპასუხა დასმულ შეკითხვებს და მათი სათანადო ორგანოთა წინაშე დაყენების პირობა დადო.

საქართველოში სრ საგანგებო და სრულუფლებიანმა ელჩმა იური ვარდანიანმა ახალციხის, ახალქალაქისა და ნინოწმინდის რაიონების ყველა ახალგაზრდულ ცენტრს საჩუქრად გადასცა წიგნები.

დელეგაციის წევრები, კმაყოფილები და სამცხე-ჯავახეთის სომეხი მოსახლეობის მხარდაჭერის მზადყოფნის განწყობით, შუაღამისას დაბრუნდნენ თბილისში.