19 ივლისს დასრულდა საქართველოს სომხური სათვისტომოს ახალგაზრდა ლიდერთა გადამზადების პროგრამა. პროგრამის ინიციატორი იყო საქართველოში სომეხთა ეპარქიასთან არსებული „ჰაირტუნ“ ცენტრის ახალგაზრდული განყოფილება („ჰაიარტუნ“ ცენტრის სულიერი ინსპექტორი: დიაკვანი გევორგ ანტონიანი), სრ სპორტისა და ახალგაზრდობის საქმეთა სამინისტროს, სრ დიასპორის სამინისტროსა და გალუსტ გიულბენკიან ფონდის ფინანსური მხარდაჭერით. პროგრამაში მონაწილეობდა 32 ახალგაზრდა დედაქალაქსა და საქართველოს სხვადასხვა რეგიონებიდან. ამიერკავკასიაში კათოლიკური ეკლესიის მისიის მმართველის ეპისკოპოს ჯუზეპე პაზოტოს კურთხევით, პროექტი განხორციელდა კათოლიკური ეკლესიის კომპლექსში - წეროვანის საგარეუბნო დაბაში.

პროგრამის ფარგლებში მონაწილეებს საშუალება მიეცათ გაცნობოდნენ სომეხი ხალხისა და სომხური ეკლესიის ისტორიას (საქართველოში სომეხთა ეპარქიის წინამძღვარი ეპისკოპოსი ვაზგენ მირზახანიანი), თბილისის სომხურ ისტორიულ და კულტურულ ძეგლებს (საქართველოში სომეხთა ეპარქიის „ჰაიარტუნ“ ცენტრის კოორდინატორი ლევონ ჩიდილიანი), სამოქალაქო განათლების (აშშ-ის მონტანა უნივერსიტეტის დოქტორანტი, საქართველოს უნივერსიტეტის ლექტორი მილენა ოგანესიანი), ეთნიკური და რელიგიური უმცირესობების უფლებების (საქართველოში სომეხთა ეპარქიის წინამძღვრის მრჩეველი და იურიდიული განყოფილების ხელმძღვანელი ლევონ ისახანიანი), თანამედროვე საზოგადოებაში ახალგაზრდა ლიდერის როლის (საქართველოში «Grant Thorntn»-ის წარმომადგენელი ნელსონ პეტროსიანი) საკითხებს.

სტუმრის სტატუსით პროგრამაში მონაწილეობდნენ საქართველოში სრ საგანგებო და სრულუფლებიანი ელჩი ჰოვანეს მანუკიანი, რეინტეგრაციის საკითხებში საქართველოს სახელმწიფო მინისტრი პაატა ზაქარეიშვილი, საქართველოს ეროვნული უშიშროების საბჭოს მდივნის მოადგილე თამარ კინწურაშვილი, საქართველოს პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარე გედევან ფოფხაძე და თავმჯდომარის მოადგილე რუსლან პოღოსიანი, საქართველოს სახალხო დამცველის (ომბუდსმენი) ოფისთან არსებული ტოლერანტობის ცენტრის ხელმძღვანელი ბექა მინდიაშვილი, ლოს ანჯელესის კალიფორნიის უნივერსიტეტის პროფესორი რიჩარდ ჰოვანისიანი.

პროგრამის მონაწილეებმა მიიღეს სერტიფიკატები, რის შემდეგაც ისინი ეწვივნენ თბილისის სომეხ მწერალთა და საზოგადო მოღვაწეთა ხოჯივანქის პანთეონს და იქ ხე დარგეს. დასასრულს მათ დაათვალიერეს საქართველოს სომეხთა ეპარქიის „ჰაიარტუნ“ ცენტრი, შემდეგ სანთლები დაანთეს და ილოცეს თბილისის ეკლესიაში „სურბ ეჯმიაწინ“.