2017 թվականի հունվարի 10-ին, Վրաստանի ազգային թանգարանի Դմիտրի Շևարդնաձեի անվան ազգային պատկերասրահի չորս դահլիճներում ներկայացվեցին տաղանդավոր գեղանկարիչ Ալեքսանդր Բաժբեուկ Մելիքովի 96 կտավներ: Դա մեծավարպետ նկարչի աշխատանքների առաջին ցուցադրությունն էր Թբիլիսիում: Ցուցահանդեսը, որը կազմակերպել էր Վրաստանի ազգային պատկերասրահը Վրաստանի հայ նկարիչների միության նախագահ, շնորհալի նկարչուհի Իռեն Օհանջանովայի նախագծով և համակարգմամբ, նվիրված էր Ալեքսանդր Բաժբեուկ-Մելիքովի ծննդյան 125-ամյակին և մահվան 50-րդ տարելիցին:

2017 թվականի հունարի 6-ին, Սուրբ Ծննդյան և Աստվածհայտնության հրաշափառ տոնին նվիրված Բաթումի Սուրբ Փրկիչ եկեղեցում Աջարիայի, Գուրիայի և Իմերեթիի հայության հոգևոր հովիվ Տեր Արարատ քահանա Գումբալյանը, հոգևոր ու դպրաց դասի մասնակցությամբ մատուցեց Սուրբ և Անմահ Պատարագ: Հարյուրավոր հավատացյալներ միաբանվել էին Փրկչի Ծննդյան խորհրդին հաղորդակից լինելու: Բոլորի շուրթերին էր. «Քրիստոս ծնավ և հայտնեցավ, օրհնյալ է Հայտնությունը Քրիստոսի» բարի ավետիսը:

2017 թվականին Սուրբ Ծննդյան և Աստվածհայտնության առաջին տաղավար տոնի առիթիվ Սուրբ և Անմահ Պատարագ մատուցվեց Վիրահայոց Թեմի եկեղեցիներում: Դեռևս հունվարի 5-ի երեկոյան Սուրբ Ծննդյան նախատոնակին՝ Թբիլիսիի Սուրբ Գևորգ առաջնորդանիստ և Սուրբ Էջմիածին եկեղեցիներում մատուցվեց Ճրագալույցի Սուրբ Պատարագ:

Սիրելի հայորդիներ,

Ջերմորեն շնորհավորում ենք ձեզ Ամանորյա և Սուրբ Ծննդյան նվիրական տոների առիթով: Աղոթում ենք Բարձրյալ Աստծուն, որ մեր Երկնավոր Հայրը արևշատ տարիներ, հոգևոր երջանկություն և հաջողություններ պարգևի ամենքիդ: