2015 թվականի մարտի 29-ին Հայ Առաքելական Ուղղափառ Սուրբ Եկեղեցին նշեց Ծաղկազարդը՝ Հիսուս Քրիստոսի հաղթական մուտքը Երուսաղեմ: Այդ տոնը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողմից տարիներ առաջ հռչակվել է մանուկների օրհնության օր:

Առավոտից մարդաշատ էր Թբիլիսիի Սուրբ Էջմիածին Եկեղեցու բակը և շուրջբոլորը: Հավատացյալներով լեփ-լեցուն եկեղեցում առավոտյան ժամերգությունից հետո մատուցվեց Սուրբ և Անմահ Պատարագ: Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը, ով օրվա Պատարագիչն էր, իր քարոզում հանգամանալից կերպով ներկայացրեց Ծաղկազարդի խորհուրդն ու տոնի հոգևոր պատգամը, խոսեց Հիսուս Քրիստոսի երկրային կյանքի վերջին մի քանի դրվագների մասին:
Այնուհետև Սրբազան Հոր կողմից կատարվեց մանուկների օրհնության կարգ:

Օրվա ընթացքում չէր դադարում մարդկանց հոսքը Հայոց Եկեղեցի: Հոգևոր հայրերի կողմից օրհնվում էին ուռենու ոստերը ու բաժանվում ժողովրդին, քանզի ոստեր և ճյուղեր ընծայելը խորհրդանշում է առանձնակի պատիվներ և հանդիսավորություն:

Ծաղկազարդի տոնակատարություններ տեղի ունեցան նաև Սամցխե-Ջավախքի, Քվեմո Քարթլիի և Բաթումիի հայոց եկեղեցիներում: