2018 թվականի նոյեմբերի 11-ին բարեկամական-ճանաչողական այցով Թբիլիսի ժամանեց Ախալքալաքի երիտասարդական կենտրոնի 40 հոգուց բաղկացած խումբը՝ (7 մանկավարժ, 33 աշակերտ) կենտրոնի տնօրեն Կարինե Թադևոսյանի գլխավորությամբ: Այցի նպատակն էր ծանոթանալ Թբիլիսիի տեսարժան վայրերին,  շրջայց կատարել  հինավուրց քաղաքի հայկական հետքերով, նաև խորացնել այն բարեկամական-ընկերական կապերը, որ Ախալքալաքի երիտասարդական կենտրոնի և Վիրահայոց թեմի «Հայարտուն» կենտրոնի սաների միջև հաստատվել էր դեռևս մայիս ամսին թբիլիսեցիների Ախալքալաք կատարած այցի ժամանակ:   
Հյուրերին դիմավորեց և ուղեկցեց Թեմի մեկօրյա վարժարանների պատմության ուսուցիչ Ռևիկ Կարապետյանը: Նրանք այցելեցին  Մանթաշովյան առևտրական շարքերը, տեսան խոնարհված Սուրբ Նորաշեն եկեղեցին, Սայաթ-Նովայի և Սերգեյ Փարաջանովի հուշարձանները, այնուհետև հյուրընկալվեցին Սուրբ Գևորգ առաջնորդանիստ եկեղեցում: Կիրակնօրյա Սուրբ Պատարագին մասնակցելուց հետո հյուրերն արժանացան թեմի առաջնորդ Գերաշնորհ Տեր Վազգեն եպիսկոպոս Միրզախանյանի ջերմ ընդունելությանը և առաջնորդարանի կազմակերպած հյուրասիրությանը:
Շարունակելով իրենց շրջայցը Թբիլիսիում, խումբը՝ Մետեխի ամրոցը դիտելուց հետո  այցելեց Հավլաբարի Սուրբ Էջմիածին եկեղեցի: Հինավուրց եկեղեցում մոմեր վառելուց և աղոթք անելուց հետո նրանք տեղափոխվեցին թեմի «Հայարտուն» կրթամշակութային և երիտասարդական կենտրոն:
Կենտրոնի Գալուստ Գյուլբենկյան սրահում, ներկաներին ողջունեց եվ «Հայարտան» գործունեությունը ներկայացրեց կենտրոնի ղեկավար  Եվգենյա Մարկոսյանը։ Նա խոսքը փոխանցեց ԱԵԿ-ի պատասխանատու Կարինե Թադեւոսյանին, ով արժևորելով  նման փոխադարձ այցելությունների նշանակությունը հայեցի դաստիարակության և անհատի ձևավորման գործում, նկարների միջոցով ծանոթացրեց այն մեծ աշխատանքին, որ իրականացնում է կենտրոնն իր երկու մասնաշենքերում ազգայինը պահպանելու, մշակույթը զարգացնելու և ավանդույթները սերունդներին փոխանցելու ուղղությամբ:  
Բարեկամության կամուրջն էլ ավելի ամրապնդվեց, երբ Վիրահայոց թեմի առաջնորդի հանդիսապետությամբ, կայացավ ‹‹Երկիր Նաիրի›› խորագրով  համերգը, մասնակցությամբ  երկու կենտրոնների համույթների, ստեղծագործական խմբերի և անհատ կատարողների: Երգեցին   հայրենասիրական եւ էստրադային երգեր, պարեցին հայկական ազգագրական պարեր, դուդուկով եվ դհոլով նվագեցին Կոմիտասի ստեղծագործություններից եւ ասմունքեցին Վահան Տերյան ու Համո Սահյան։
ԱԵԿ-ի պատասխանատու Կարինե Թադևոսյանը և ‹‹Հայարտուն ›› կենտրոնի ղեկավար  Եվգենյա Մարկոսյանը  փոխանակեցին հուշանվերներ:
Միջոցառումն իր օրհնության և գնահատանքի խոսքով եզրափակեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Թեմակալ առաջնորդը կարևորեց փոխադարձ այցերը եւ նմանատիպ միջոցառումները հայապահպանության եւ մշակույթի զարգացման տեսանկյունից, սաների փոխադարձ մերձեցման, բարեկամական կապերի հաստատման և զարգացման նշանակությունը, ինչը նաև ազգային հպարտության, մշակույթի ճանաչման և տարածման միջոց է: Սրբազան հայրն իր գնահատանքը բերեց սաների պատրաստվածության, կենտրոնի ղեկավար Կարինե Թադևոսյանի, ուսմասվար Ռիմմա Ռստակյանի, ուսուցիչներ Վաչագան Ռստակյանի, Սիլվա Ղարղարյանի, Նազիկ Հակոբյանի և մյուսների նվիրական աշխատանքի համար:
Ախալքալաքից ժամանած հյուրերը այցելեցին նաև Հայ գրողների և հասարակական գործիչների Խոջիվանքի պանթեոն,, որտեղ նրանց դիմավորեց արժանապատիվ  Տեր Տաթև քահանա  Մարուքյանը։ Տեր Հայրը ներկաներին պատմեց պանթեոնի  մասին, միասին աղոթք արեցին այստեղ հանգչող հոգիների խաղաղության համար: Թբիլիսիի  Խաղաղության կամրջի գեղեցկությամբ ավարտվեց  Ախալքալաքի երիտասարդական կենտրոնի սաների և մանկավարժների այցը Թբիլիսի: Ջերմ տպավորությունները դարձան այն բանի  առհավատչյան և հույսը, որ երկու կենտրոնների բարեկամության կամուրջը դեռ երկար կձգվի։