|
Լուրեր
|
|
 2018 թվականի հունիսի 2-ին, Վիրահայոց թեմի «Հովհաննես Թումանյանի տուն» գիտամշակութային կենտրոնում կայացավ Վրաստանի գրողների միության,Վրաստանի հայ գրողների «Վերնատուն» միության և «Արիոն» պուշկինյան գրական ընկերության անդամ, բանաստեղծուհի Մարինա Կիրակոսյան-Մոսեսովայի ստեղծագործական երեկոն: Ճանաչված բանաստեղծուհու պոեզիայի հմայքն այստեղ էր բերել բանաստեղծական խոսքի երկրպագուներին:
Բանաստեղծուհին անձանբ վարելով երեկոն, հնչեցրեց իր այն գործերը, որոնք անտարբեր չթողեցին հյուրերին: Դրանք հագեցած էին հույզերի խորությամբ, շոշափած հիմնախնդիրների սրությամբ, նկարագրվող փաստերի իրատեսությամբ և թեմատիկայի հրատապությամբ:
Բանաստեղծուհին սուր զգացողությամբ է ընկալում կյանքն իր բոլոր ցնծալի երևույթներով, նաև բարդ խոչընդոտներով: Նրա խոր մարդասիրությամբ հագեցած, մարդուն գովաբանող բանաստեղծությունները թափանցված են Աստծու նկատմամբ հավատով:
Հայրենասիրական ոգով գրված բանաստեղծություններում զգացվում է բանաստեղծուհու սերը իր երկու հայրենիքների՝ Հայաստանի և Վրաստանի նկատմամբ:
Երեկոն գեղեցկացրին Ռախմանինովի ռոմանսները և Կոմիտասի երգերը Սվետլանա Տատոևայի կատարմամբ, Կարեն Միրզոյանի նվագակցությամբ:
Մարինա Կիրակոսյան-Մոսեսովայի բանաստեղծությունները ռուսերեն և հայերեն ներկայացրեցին թիվ 104 հայոց դպրոցի սաները: Հնչեցին բանաստեղծ Արա Արտյանի թարգմանությունները հայերեն, իսկ Գարի Ղալամքարովը ընթերցեց Աղասի Գևորգյանի Մարինային նվիրած բանաստեղծության վրացերեն թարգմանությունը:
Ուշագրավ էր Սլավա Սահակյանի «Աստծու տաճար» բանաստեղծության հայերեն թարգմանությունը, որը ներկաների ուշադրությանը ներկայացրեց թարգմանության հեղինակը:
Երեկոն անցավ ջերմ և բարեկամական մթնոլորտում:
|
