|
 2018 թվականի մայիսի 11-ին, Վիրահայոց թեմի «Հովհաննես Թումանյանի տուն» կենտրոնում կայացավ անսովոր գրական երեկո, որը նախաձեռնել էր Վրաստանի հայ գրողների «Վերնատուն» միության անդամ Արտեմ Գրիգորենցը (Կիրակոզով): Նա հրավիրել էր հյուրերի, որպեսզի նրանց հետ միասին քննարկեր իր բանաստեղծությունները մինչև դրանք տպագրության ուղարկելը:
Իր ներածական խոսքում Արտեմ Գրիգորենցը հայտարարեց, որ իրեն բանաստեղծ չի համարում, սակայն երբեմն չի կարող թղթին չհանձնել բանաստեղծական այն տողերը, որ ակամայից ծնվում են հոգում: Եվ ահա այդպես ստեղծվել է բանաստեղծությունների մի ամբողջ հատորյակ, որի հրատարակությունը ինքը մտադիր է նվիրել իր 70-ամյակին:
Ներկաների շրջանում էին հայ, ռուս և վրացական գրական մտքի փայլուն դեմքերը, ստեղծագործողներ, քննադատներ, ովքեր միանշանակ ընդգծեցին հեղինակի որոշումը՝ լսելու և ընդունելով ընկերների խորհուրդները և ցուցումները ժողովածուն առավել լիարժեք ընթերցողին ներկայացնելու համար:
Ու միմյանց հաջորդաբար հնչեցին դահլիճում Արտեմ Գրիգորենցի բանաստեղծությունները, հանգավոր մտքերը ռուսերեն, նաև հայերեն և վրացերեն թաարգմանությունները, որոնք կատարել էին նրա գրչակից ընկերները: Ապագա ժողովածուի նմուշները տարբեր լեզուներով հիանալի ասմունքով ներկայացրեցին թիվ 104 դպրոցի սաները, ովքեր եկել էին գրադարանավարուհի Հասմիկ Անտոնյանի գլխավորությամբ:
Արտեմ Գրիգորենցը վառ անհատականություն է: Նախկինում ինժեներ-մեխանիկը, գիտական աշխատողը, արհեստավարժ երաժիշտը նաև շնորհալի արձակագիր է, ինքնուս դրամատուրգ: Հավաքելով սիրողական թատրոնի խումբ, ինքնուրույն կերպով բեմադրեց երեք պիես, հերթում է նաև չորրորդը: Նշենք, որ վերջերս Արտեմ Գրիգորենցը դարձավ «Վրացական էլիտա» հրատարակչական տան հայտարարած մրցույթի «Ոչսովորական աշխատանքների համար» անվանակարգի հաղթող:
Արտեմ Գրիգորենցի առաջին հրապարակումները հայտնվեցին 90-ական թվականների սկզբներին ռուսալեզու«Литературная Армения»(Գրական Հայաստան) ամսագրում, այնուհետև թարգմանությունները տպագրվեցին «Վերնատուն» տարեգրքի և «Կամուրջ» ալմանախի էջերում:
Գրական երեկոն ավարտվեց «Հովհաննես Թումանյանի տուն» կենտրոնի հոգևոր տեսուչ արժանապատիվ Տեր Կիրակոս քահանա Սիմոնյանի գնահատանքի խոսքով: Նա նշեց, որ եթե Վիլյամ Սարոյանը ապրելով Ամերիկայում, գրել է անգլերեն, սակայն նրա ստեղծագործությունների ոգին հայկական է: Այդպես է նաև Արտեմ Գրիգորենցի մոտ. ապրելով Վրաստանում և ստեղծագործելով ռուսերեն, նա պահպանել է հայկական ոգին, որ այնպես լիաշունչ զգացվում է նրա բոլոր ժանրի ստեղծագործություններում:
Ահա այսպիսին էր Արտեմ Գրիգորենց (Կիրակոզովի) ստեղծագործական երեկոն, արժևորված նրա ստեղծագործական, կազմակերպչական և ռեժիսորական ունակություններով:
|
