|
 2018 թվականի մայիսի 25-ին Վիրահայոց թեմի «Հայարտուն» կենտրոնի Գալուստ Գյուլբենկյան դահլիճի պատերը զարդարել էին արհեստավարժ ջութակահար Գարի Նալբանդյանի կտավները: Ռուսթավիի «Սուրբ Գրիգոր Նարեկացի» հոգևոր, կրթա-մշակութային և երիտասարդական կենտրոնից հետո Գարի Նալբանդյանն իր գեղանկարչությունը ներկայացրեց թբիլիսահայ արվեստասեր հասարակայնությանը:
Իր հուզաշխարհն ու ապրումները, իր ներաշխարհը արտահայտող ջութակի լարերի հպումները վերջին տարիներին ակամայից փոխարինվեցին կտավի վրա գույներով և վրձնի շարժումներով հոգու պոռթկումների: Ու թեև նկարիչն իրեն բնորոշում է որպես ինքնուս, արվեստի կանոններին ոչ գիտակ, սակայն ցուցահանդեսին ներկայացրած նրա բոլոր աշխատանքները, որ երեք տասնյակից ավելի էին, բարձրարժեք գործեր էին: Բնանկար, նատյուրմորտ, բնության երևույթ, մարդկային կոնկրետ խարակտեր, խոհա-փիլիսոփայական, հոգեբանական տարբեր ապրումներով սյուժեներ ստեղծվել էին գույների ճիշտ համադրությամբ, իրատեսական վրձնախաղով, ռեալիստական և սյու-ռեալիստական ոճով:
Գարի Նալբանդյանի կտավի վրա արտացոլված ներաշխարհի պոռթկումները տեսնելու էին եկել Թբիլիսիի, Ռուսթավի հայ համայնքի անդամները, արվեստի գործիչներ, նկարիչներ, երաժիշտներ:
Միջոցառումը բացեց Վիրահայոց թեմի Մշակույթի բաժնի տնօրեն և «Հայարտուն» կենտրոնի ղեկավար Լևոն Չիդիլյանը: Վերջինս արժևորեց Գարի Նալբանդյանի ստեղծագործական աշխարհը, նկարի միջոցով շրջապատն ու մտացածինը արտահայտելու նրա ունակությունը և շնորհավորեց անհատական ցուցահանդեսի բացման կապակցությամբ,մանավանդ որ դրանք տեսնելու հնարավորություն ընձեռվեց նաև Թբիլիսիի հայ համայնքի անդամներին:
Երաժիշտ-նկարչի աշխաանքները իրենց ելույթներում արժևորեցին Մերուժան Շահումյանը, Գիորգի Մանոյան, Վալիկո Առաքելովը, Լևոն Օսիպովը, Իննա Դավիթաշվիլին և ուրիշներ: Հատկանշական էր համացանցով Գարի Նալբանդյանի աշխատանքներին ծանոթացած «Լուկոյլի» փոխնախագահ Ալեքս Սկվարցովի ելույթը, ով նույնպես լինելով սիրողական նկարիչ, հիացած է Նալբանդյանի աշխատանքներով և բարձր է գնահատում նրա իրատեսական, նաև տարբեր ապրումներ և զգացմունքներ արտահայտող կտավները:
Ամփոփիչ խոսք ասաց Ռուսթավիի հայության հոգևոր հովիվ արժանապատիվ Տեր Նարեկ քահանա Ղուշչյանը: Ցուցադրված աշխատանքները այն կերտումներն են, որ հեղինակի ներաշխարհի արտահայտություն են նույն տաղանդով, նույն ձիրքով և ձգտումով:
Տարբեր էին նկարչի կողմից դիտողի գնահատականին ներկայացված կտավները. խորհրդավոր, վերնագրված մտածելու տեղիք տվող անվանումներով, արդիական, իրատեսական, նաև երևակայական, ոչ իրական: Գարի Նալբանդյանի աշխատանքները «Հայարտուն» կենտրոնում կցուցադրվեն մինչև հունիսի մեկը:
|
