2018 թվականի օգոստոսի 12-ին Հայ Առաքելական Սուրբ Եկեղեցին նշեց Սբ. Աստվածամոր Վերափոխման տոնը: Այն հինգ տաղավար տոներից չորրորդն է և Տիրամորը նվիրված ամենահին տոնը: Աստվածամոր տոնը Վիրահայոց թեմի բոլոր եկեղեցիներում նշանավորվեց Սբ. Պատարագներով և խաղողօրհնության կարգով:

Տոնական Պատարագները թեմի Ախալքալաքի և Նինոծմինդայի մի շարք գյուղերի Եկեղեցիներում սկսվել էին դեռևս շաբաթ օրվանից: Համայնքներին նվիրական ծառայություն մատուցեցին եկեղեցիների հոգևոր հայրերը: Նրանք վաղ առավոտվանից ժամերգություններ և խաղողի ու ողջ տարվա բերք ու բարիքի ավանդական օրհնության կարգ կատարեցին տեղերում:

Այդ օրը թբիլիսահայ հավատացյալները Ուխտի Պատարագի մեկնեցին Հայաստանի Հանրապետության Լոռու մարզի Ախթալայի Սուրբ Աստվածածին եկեղեցի, իսկ մյուսները իրենց սերը Աստվածամոր հիշատակին արտահայտեցին եկեղեցիներ այցելությամբ և տոնական Սբ. Պատարագներին մասնակցությամբ:

Վաղ առավոտից բազմամարդ էին Վիրահայոց թեմի եկեղեցիները: Խորանները զարդարվել էին օրվա խորհրդանիշ խաղողի տեսակներով ու մրգով: Ու չէր դադարում մարդկանց հոսքը դեպի եկեղեցի. գալիս էին գեղեցիկ զարդարված զամբյուղներով, սկուտեղներով՝ տարվա բերք ու բարիքի օրհնությունը և Բարձրյալի բարեխոսությունը ստանալու ակնկալիքով:

Առավոտյան ժամերգությունից հետո եկեղեցիներում կատարվեց Անդաստանի կարգ: Օրհնվեցին աշխարհի չորս ծագերը և ժողովուրդները:Այնուհետև ամենուրեք մատուցվեց Սբ. Պատարագ:

Թբիլիսիի Առաջնորդանիստ Սբ. Գևորգ եկեղեցում Պատարագիչն էր Վիրահայոց Թեմի առաջնորդ, Գերաշնորհ Տեր Վազգեն եպիսկոպոս Միրզախանյանը:

Տոնական Սբ. Պատարագին ներկա էին թբիլիսահայ հասարակայնության ներկայացուցիչներ, մտավորականներ, կառւյցների ղեկավարներ, բազում հավատացյալներ:

Հընթացս Սբ. Պատարագի, Պատարագիչ Վազգեն Սրբազանը հավուր պատշաճի քարոզ խոսեց օրվա խորհրդի՝ Տիրամոր մեծ Առաքելության, նրա ննջման և Հարության, Վերափոխման մասին, կարևորեց Հայ Եկեղեցու տածած սերն ու խորին հարգանքը Սբ. Մարիամ Աստվածածնի հանդեպ, հորդորեց Աստվածամոր օրինակով շարունակել ապրել վերափոխման լույսով և Սբ. Հարության հավատով: Պատարագիչ Սրբազանը խաղաղություն և առաջընթաց մաղթեց Հայաստան և Վրաստան աշխարհներին, առողջություն և ապահով ծառայություն Արցախի խաղաղությունն ապահովող զինվորներին, շնորհավորեց ներկաներին, հատկապես մայրերին և Մարիամներին տոնի առիթով:

Ս. Պատարագի ավարտին, հանդիսապետությամբ Թեմակալ առաջնորդի, եկեղեցու խորանում կատարվեց «Խաղողօրհնեքի» հանդիսավոր արարողությունը, ընթերցվեց օրվա խորհուրդն ամփոփող ավետարանական հատվածը, այնուհետև բարձրացվեց Ս. Ներսես Շնորհալու «Խաղողի օրհնության» աղոթքը: Հոգևոր սպասավորները հավատացյալներին բաժանեցին արևահամ խաղող, որն ապահովել էր եկեղեցու խաչքավոր Յուրի Երեմյանը:

Բաթումի Սբ. Փրկիչ եկեղեցում տոնական օրվա Սբ. Պատարագին ներկա էին ինչպես բաթումահայեր, այնպես էլ մայր հայրենիքից և այլ վայրերից ժամանած տարբեր ազգի զբոսաշրջիկներ:

Ախալքալաքի «Սուրբ խաչ» եկեղեցում Պատարագիչն էր արժանապատիվ Տեր Տաթև քահանա Մարուքյանը: Պատարագին ներկա էին հավատացյալներ, ուխտավորներ և ճամբարականներ: Սբ. Պատարագը, քարոզը և խաղողօրհնեքի կարգը մեծ ոգևորություն բերեց տեղի ժողովրդին:

Նինոծմինդայի Սբ. Սարգիս եկեղեցում Աստվածամոր ննջման տոնին նվիրված Սբ. Պատարագից հետո հոգևոր հովիվ արժ. Տեր Արմաշ քհն. Պողոսյանը, ընկերակցությամբ Գանձայի Սբ. Կարապետ եկեղեցու նորանշանակ Տեր Գևորգ քհն. Ասատրյանի, Խոջաբեկ գյուղում մասնակցեց հուշաղբյուրի բացմանը, օրհնեց այն և կատարեց խաղողօրհնեքի կարգ:

Ախալցիխեի Սբ. Գրիգոր Լուսավորիչ Եկեղեցում Հոգշ․ Տ․ Հակոբ աբեղա Սահակյանի մատուցած տոնական Սբ. Պատարագի ավարտին, հավատացյալներին բաժանվեց խաչքավոր Արթուր Բալասանյանի և հավատավոր ժողովրդի կողմից բերված խաղողը: Պատկան մյուս եկեղեցիներում կատարվեց խաղողօրհնեքի կարգ:

Երկուշաբթի առավոտյան Վիրահայոց թեմի եկեղեցիներում կմատուցվի հանգուցյալների հիշատակի Սբ. Պատարագ և կկատարվի հոգեհանգստյան կարգ: