2017 թվականի նոյեմբերի 18-ին Վիրահայոց թեմի Ռուսթավիի «Սուրբ Գրիգոր Նարեկացի» հոգևոր, կրթամշակութային և երիտասարդության կենտրոնում կազմակերպված գրական-երաժշտական միջոցառումը նվիրված էր Սուրբ Թարգմանիչ Վարդապետների հիշատակին:

Միջոցառմանը մասնակցում էին կենտրոնի Սուրբ Եղիշեի անվան կիրակնօրյա դպրոցի ավագ և կրտսեր դասարանների սաները, երգի «Բերկրի» և «Նեմրութ» պարի խմբերը: Այն կազմակերպել էր հայոց լեզվի և գրականության ուսուցչուհի Մարգարիտա Շատարևյանը:

Միջոցառմանը ներկա էին Վրաստանում ՀՀ դեսպանության խորհրդական Արտակ Գրաբսկին, Վրաստանի հայ գործարարների միության նախագահ Սամվել Աղեկյանը, Վիրահայոց թեմի առաջնորդարանի մշակույթի բաժնի տնօրեն Լևոն Չիդիլյանը, կրթության բաժնի տնօրեն Եվգենյա Մարկոսյանը, Լրատվական բաժնի տնօրեն Սուսաննա Խաչատրյանը, Ռուսթավի քաղաքի հայ համայնքի անդամները, ծնողներ, հյուրեր Թբիլիսիից և մերձակա շրջաններից:

Իր օրհնաբեր ներկայությունն էր բերել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

Միջոցառումը սկսվեց «Հայր մեր»-ով և Թեմակալ առաջնորդի բարեմաղթանքով:

Սուրբ Գրիգոր Նարեկացի կենտրոնի խնամատար և Ռուսթավի քաղաքի և Մառնեուլի շրջանի հայության հոգևոր հովիվ արժանապատիվ Տեր Նարեկ քահանա Ղուշչյանը բացելով միջոցառումը,անդրադարձ կատարեց Սուրբ թարգմանիչ Վարդապետների տոնին, ովքեր ժողովրդին տվեցին գիր ու գրականության ստեղծման, մշակույթի արարման բանալին, հարթեցին քաղաքակրթության ուղին:

Ընդամենը երկու ամիս մերոպյան տառերի հետ առնչվող օտարալեզու դպրոցների հայ սաները, թեկուզև ոչճիշտ շեշտադրությամբ և ոչհայկական առոգանությամբ, սակայն հոգեհարազատ հայերենով ներկայացրեցին Սուրբ թարգմանիչների կյանքն ու գործունեությունը, կարդացին նրանց պատվիրանները, գոհունակություն և հիացմունք առաջացնելով ներկաների մոտ:

Ուրախալի էր կենտրոնի գործունեության առաջընթացը: Երեխաների խոսքը համեմված էր ազգային գեղեցիկ և նազելի պարերով, մանկական շուրթերից հնչող հայոց շարականով, որ այնպես վարպետորեն սովորեցրել էին պարուսույց Ստելլա Սելեպանովան և խմբավար Իննա Դավիթաշվիլին:

Դեռահասների մոտ ազգասիրության ու հայրենասիրության, հայ լինելու հպարտության ծիլեր դարձան հայերեն բանաստեղծությունների արտասանությունները:

Միջոցառումից իրենց ստացած տպավորությունները կիսեցին հյուրերը, միանշանակ արժևորելով Վիրահայոց թեմի առաջնորդարանի ազգասիրական ձեռնարկը՝ հոգևոր և կրթա-մշակութային այս կենտրոնի հիմնումը՝ դպրոց ու եկեղեցի չունեցող Ռուսթավիի հայությանը իրենց արմատներին վերադարձելու նպատակով:

Միջոցառումն օրհնության և գնահատանքի խոսքով ամփոփեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Սրբազան հայրը կարևորեց Աստծու խոսքը հավատացյալին նրան հասկանալի լեզվով ու ընդունելի գրությամբ մատուցելը: Դա մայր հայրենիքում և Սփյուռքում տարածվում է թարգմանիչ վարդապետների ստեղծած հայոց գրերով, պահվում ու պահպանվում է ոսկեղենիկ լեզվով ու դառնում հայի ինքնության գլխավոր երաշխիքը: «Հիրավի կենտրոնն իր գործունեությամբ փաստում է իր գոյության անհրաժեշտությունը: Այս երեխաները, որ պատմում էին Մեսրոպ Մաշտոցի, Սահակ Պարթևի, Եղիշեի, Դավիթ Անհաղթի, Մովսես Խորենացու մասին, արտասանում էին բանաստեղծություններ՝ ներշնչված էին հայերենով ու այս միջոցառումը դարձավ այն մեկնարկը, որը պետք է ծավալվի ու հզորանա, դառնա քրիստոնեական հավատք, ազգային գաղափարախոսություն և հայրենասիրություն: Ահա սա է այս կենտրոնի առաքելությունը, գործունեության նպատակը-իր խոսքում կարևորեց Թեմակալ առաջնորդը: Սրբազան Հայրը գնահատանքի խոսքեր ուղղեց միջոցառման բոլոր կազմակերպիչներին, հոգևոր հովվին և կենտրոնին աջակցող Ռուսթավիի հայությանը:

Միջոցառումն ավարտվեց Եղիշե Չարենցի «Ես իմ անուշ Հայաստանի» բանաստեղծության գեղեցիկ արտասանությամբ, որը լեզուն և հայրենիքը սիրելու յուրատեսակ երդում էր Սուրբ վարդապետների հիշատակի առջև: