2017 թվականի նոյեմբերի 13-ին, Վիրահայոց թեմի Բաթումի Ալ.Մանթաշյանցի անվան կրթամշակութային և երիտասարդության կենտրոնի «Սուրբ Գրիգոր Լուսավորիչ» նախակրթարանում տեղի ունեցավ «Բերքի և բարիքի ոսկե աշուն» խորագիրը կրող միջոցառում:

Միջոցառումն իրենց ներկայությամբ պատվել էին Բաթումիում ՀՀ գլխավոր հյուպատոս Եղիշե Սարգսյանը, Բաթումի Սուրբ Փրկիչ եկեղեցու, Աջարիայի, Գուրիայի և Իմերեթիի հայության հոգևոր հովիվ արժանապատիվ Տեր Արարատ քահանա Գումբալյանը:

Ծնողներով, մանկավարժներով, հյուրերով լեփ-լեցուն դահլիճում տիրում էր տոնական բարձր տրամադրություն:

Բացման խոսքով հանդես եկավ մշակութային կենտրոնի տնօրեն Սոնա Հովհաննիսյանը: Վերջինս նշեց, որ թերևս տարվա եղանակներից աշունը սառնաշունչ ու թախծոտն է, սակայն թոթովախոս փոքրիկների կայտառ ու պայծառ մոլորակում,զվարթ երգերում ու պարերում աշունը ուրախ է, երփնաշղարշ, բարձր տրամադրություն հաղորդող:

Նախակրթարանի սաները իրենց պայծառ աչուկներով, գեղեցիկ և ճիշտ արտասանությամբ,զվարթ երգեցողությամբ հրավառեցին ծնողների և ներկաների սրտերը:

Հավարտ միջոցառման օրհնության խոսքով հանդես եկավ Տեր Արարատ քահանա Գումբալյանը: Տեղի հայության հոգևոր հովիվը ներկաներին փոխանցեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հայրական սերն ու բարեմաղթանքը և գոհունակություն հայտնեց հանդիսությունը պատշաճ մակարդակով կազմակերպելու համար՝ խրախուսանքի խոսքեր ուղղելով թե ' սաներին, թե ' մանկավարժներին:

Մանուկների հայեցի խոսքի, գեղեցիկ արտասանության և ուրախ երգի կապակցությամբ իր հիացմունքն արտահայտեց ՀՀ հյուպատոս պարոն Եղիշե Սարգսյանը:

Միջոցառման վերջում նախակրթարանում ժողիվրդական «Ղափամա» երգի ուղեկցությամբ տեղի ունեցավ աշնան բարիքներով և հայկական ղափամայով հյուրասիրություն: