Ընթացիկ տարվա նոյեմբերի 4-ին, Թբիլիսիի Սակրեբուլոյի նախագահ Գիորգի Ալիբեգաշվիլին, իր նստավայրում ընդունեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանին: Հանդիպմանը ներկա էր նաև Վիրահայոց թեմի իրավական հարցերի և համագործակցության բաժնի տնօրեն Լևոն Իսախանյանը:

Թեմակալ առաջնորդը շնորհավորեց և հաջողություններ մաղթեց պարոն Ալիբեգշվիլուն նման պատասխանատու պաշտոնի ընտրվելու կապակցությամբ:

Կայացավ զրույց քաղաքում Հայոց եկեղեցիների մերձակա տարածքի բարեկարգման վերաբերյալ: Վիրահայոց թեմի առաջնորդը ներկայացրեց Թբիլիսիի Սուրբ Էջմիածին եկեղեցու շրջակա տարածքի բարեկարգման և հարակից կառույցների վերափոխման հարցը:

Իրավական հարցերի և համագործակցության բաժնի տնօրեն Լևոն Իսախանյանն իր կողմից Սակրեբուլոյի նախագահին դիմեց Սակրեբուլոյի համապատասխան կառույցներում փորձաշրջան անցնելու նպատակով քաղաքի ազգությամբ հայ կրթված երիտասարդներին ընդգրկելու առաջարկով:

Սակրեբուլոյի նախագահը, անդրադառնալով բարձրացված հարցերին, պատրաստակամություն հայտնեց ամեն կերպ օժանդակել Վիրահայոց թեմի առջև ծառացած խնդիրների լուծմանը: Պարոն Ալիբեգաշվիլին խոստացավ ուսումնասիրել և քննարկման ներկայացնել Թեմի առաջնորդի կողմից բարձրացված հարցերը:

Սրբազան Հայրը շնորհակալություն հայտնեց սրտառուչ զրույցի և ջերմ ընդունելության համար: