2014 թվականի հոկտեմբերի 14-ին, Վիրահայոց թեմի առաջնորդարանում տեղի ունեցավ հանդիպում Վրաստանի Կրոնական հարցերով պետական գործակալության նախագահ Զազա Վաշախմաձեի և նրա ղեկավարած գործակալության աշխատակազմի անդամների հետ:

Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը գոհունակություն հայտնեց նրանց այցելության կապակցությամբ: Առաջնորդը շնորհավորեց հյուրերին տոնական օրվա՝ Սվետիցխովլոբա տոնի կապակցությամբ և մաղթեց աստվածահաճո և արդյունավետ գործունեություն:

Հանդիպման ընթացքում քննարկվեց երկու հիմնական հարց.առաջինը առնչված էր Վրաստանում գործող ավանդական կրոնական համայնքների ֆինանսավորման խնդրի հետ, իսկ երկրորդը վերաբերում էր խորհրդային տարիներին Վիրահայոց թեմից բռնագրավված եկեղեցիների պահպանության և Թեմին վերադարձնելու հարցին:

Թեմի առաջնորդը իր պատրաստակամությունը հայտնեց համագործակիցելու գործակալության հետ՝ ի շահ Վրաստանում կրոնական համայնքների խաղաղ և միասնական գործունեության:

Իր հերթին Վրաստանի կրոնական հարցերով պետական գործակալության ղեկավար Զազա Վաշախմաձեն Թեմակալ առաջնորդին հայտնեց, որ բարձրացված հարցերը մշտապես գտնվում են գործակալության ուշադրության կենտրոնում և արվում է ամեն ինչ Վրաստանում պատմա-մշակութային ժառանգությունը պահպանելու և պետության կողմից կրոնական ավանդական համայնքներին նյութական օժանդակություն ցուցաբերելու համար: