Ընթացիկ տարվա սեպտեմբերի 27-ին, Վիրահայոց թեմի երիտասարդության հարցերի բաժնի (տնօրեն՝ Վալերի Բադալյան) նախաձեռնությամբ, «Հայարտուն» կրթա-մշակութային և երիտասարդության կենտրոնի Գալուստ Գյուլբենկյան սրահում, տեղի ունեցավ հանդիպում ՄԱԿ-ում Վրաստանի երիտասարդության ներկայացուցիչ Լաշա Շաղուլաշվիլու հետ:

Լաշա Շաղուլաշվիլին, հաջողությամբ անցնելով ընտրական մրցույթի բոլոր փուլերը, արժանացել է 2014 թվականին Վրաստանի երիտասարդությանը ՄԱԿ-ում ներկայացնելու պատվին: Հոկտեմբերին ՄԱԿ-ում երիտասարդության դեսպանը մասնակցելու է ՄԱԿ-ի Գլխավոր վեհաժողովի և ՄԱԿ-ի կոմիտեների նիստերին, որտեղ նա խոսելու է Վրաստանի երիտասարդության առջև ծառացած մարտահրավերների և խնդիրների մասին:

Երկրի երիտասարդությանը լիարժեք ներկայացնելու համար, վերջինս ողջ տարվա ընթացքում բազմաթիվ հանդիպումներ է ունեցել Վրաստանի տարբեր տարածաշրջաններում բնակվող երիտասարդների, երիտասարդական կազմակերպությունների ներկայացուցիչների, ուսանողների հետ: Ծանոթության և համագործակցության բնույթ էր կրում նաև վիրահայ երիտասարդության հետ այս հանդիպումը:

Վիրահայ երիտասարդները իրենց ելույթներով ներկայացրեցին այն խնդիրները, որոնց հետ առնչվում են իրենք: Բոլոր բանախոսները, կարևորելով իրենց՝ Վրաստանի քաղաքացի լինելու, քաղաքացիական հասարակության անդամ հանդիսանալու հանգամանքը և թվարկելով այն արտոնությունները, որ տրվում է ազգային փոքրամասնության ներկայացուցիչ երիտասարդներին կրթություն ստանալու, հատկապես բարձրագույն ուսումնական հաստատություն ընդունվելու ժամանակ, այնուամենայնիվ կարևորեցին մայրենի լեզվով դպրոցների նվազման, նախաթեստային քննությունների, հայոց պատմությունը սխալ ներկայացնելու և այդ առարկան հայկական դպրոցների ծրագրից հանելու, վրացերենի ուսուցման ոչմասնագետ ուսուցիչների հայկական դպրոց գործուղելու և հայ երիտասարդներին իրենց ազգային պատկանելության պատճառով աշխատանք չտալու պահերը:

Իր ամփոփիչ խոսքում ՄԱԿ-ում Վրաստանի երիտասարդության ներկայացուցիչը ասաց, որ այստեղ բարձրացված բոլոր հարցերին ինքը իրազեկվել է իր հանդիպումների ընթացքում և այդ խնդիրները անպայման տեղ կգտնեն հոկտեմբերին նախատեսված իր ելույթում:

Վրաստանի հայ երիտասարդության ներկայացուցիչները պատրաստակամությամբ ընդունեցին Լաշա Շաղուլաշվիլու հետ համագործակցության առաջարկությունը, կարևորելով երկրի ժողովրդավարական կառուցման գործում ազգային փոքրամասնությունների ընդգրկվածության դերն ու նշանակաությունը: