Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ «Հայարտուն» կրթա-մշակութային և երիտասարդության կենտրոնի խորհրդի հերթական նիստը: Այն սկսվեց Տերունական աղոթքով և Թեմի առաջնորդի օրհնությամբ:

Նիստը նախագահող Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը ողջունելով ներկաներին, իր գնահատանքը բերեց խորհրդի անդամներին՝ համատեղ և արդյունավետ գործունեության համար: Առաջնորդը անդրադարձ կատարեց «Հայարտուն» կենտրոնի կատարած աշխատանքներին, արձանագրելով այն 50 –ից ավելի միջոցառումները, որ Վրաստանում ՀՀ դեսպանության, Թբիլիսիի Պետրոս Ադամյանի անվան հայպետդրամայի թատրոնի, հասարակական կազմակերպությունների, գրականության, արվեստի անհատ գործիչների հետ համագործակցության ձևաչափով իրականացվել են վրաց օրհնյալ հողում և Մայր Հայրենիքում:

Սրբազան Հայրը արժևորեց այն առաքելությունը, որի իրականացմանը կոչված է կենտրոնը: Դա Վրաստանում հոգևոր ու ազգային մշակույթի և ավանդույթների պահպանումն է և դրանց փոխանցումը երիտասարդ սերնդին, ինչպես նաև հայ-վրացական մշակութային կապերի ամրապնդումը և զարգացումը: Անդրադառնալով «Հայարտան» և հասարակական կազմակերպությունների համագործակցության ձևաչափին, Առաջնորդը խոսեց այն մասին, որ հիմնադրման օրից «Հայարտուն» կենտրոնը ծավալել է համագործակցություն հասարակական տարբեր կառույցների հետ, քաջալերել, օգնել նրանց, օժանդակել նոր ընկերությունների ձևավորմանը:

Թեմակալ առաջնորդը ներկաներին իրազեկեց Սուրբ Գևորգ առաջնորդանիստ եկեղեցու վերանորոգչական աշխատանքների և Թումանյանի տան՝ «Վերնատան» գործերի ընթացքի մասին:

Նիստի նախագահը կարևորեց հասարակական կազմակերպությունների դերը Վրաստանում հայության քաղաքացիական հասարակության ձևավորման գործում: Առաջնորդը նաև ընդգծեց հասարակական կազմակերպությունների և անհատ գործիչների ինքնուրույնաբար գործելու, հանրության լայն շրջանակներում կայանալու ժամանակի պահանջը: Ի մասնավորի Թեմի առաջնորդը առանձնահատուկ կերպով շեշտեց ինքնուրույնության առավել աշխուժացումը, հայ-վրացական մշակութային, հասարակական կապերի խորացումը, համատեղ ծրագրերի իրականացումը: Պահպանելով քաջալերելո

ւ և օգնելու առաքելությունը, կենտրոնը աջակցություն է ցուցաբերելու միջոցառումների իրականացմանը և արձագանքելու է Վրաստանում հայությանը հուզող հարցերին:

«Հայարտուն» կենտրոնի ղեկավարի հետ սերտ համագործակցության ձևաչափով ընդգծվեց իրականացվող բոլոր միջոցառումների որակական մակարդակի առավել բարձրացման անհրաժեշտությունը:

Խորհրդի անդամների կողմից եղան տարբեր առաջարկություններ, որոնք կքննարկվեն առաջիկա ժողովներում և կյանքի կկոչվեն տարբեր ոլորտներում:

Ժողովի ավարտին Թեմի առաջնորդը առաջարկեց «Հայարտուն» կենտրոնի խորհրդի անդամներին՝ գործել որպես Թեմակալ առաջնորդի խորհրդակցական մարմին մինչև եկեղեցական և թեմական խորհուրդների ձևավորումը: