Արևմտյան Հայաստանում օսմանյան Թուրքիայի կողմից իրականացված Հայոց ցեղասպանության 99-րդ տարելիցին նվիրված Վիրահայոց թեմի հիշատակի միջոցառումներից հերթականը «Վերքը դեռ թարմ է» խորագրով գիտա-մշակութային երեկոն էր, որ նախաձեռնել էր «Հայկական գիտահետազոտական կենտրոն Վրաստանում» հասարակական ասոցիացիան Վիրահայոց թեմի «Հայարտուն» կենտրոնի աջակցությամբ: Միջոցառումը զուգորդված էր ցեղասպանության արհավիրքներն արտացոլող լուսանկարներով և եռալեզու մեկնաբանություններով, որը վիրահայ երեխաների աջակցության «Արևիկ» բարեգործական հիմնադրամին տրամադրել էր Հայաստանի Հանրապետության ցեղասպանության ինստիտուտի և թանգարանի տնօրինությունը:

Երեկոյին ներկա էին թբիլիսահայ մտավորականության և համայնքի ներկայացուցիչներ:
Միջոցառումը բացեց «Վրաստանում հայկական գիտա-հետազոտական կենտրոն» հասարակական կազմակերպության նախագահ Էմմա Ախտյանը: Նա երախտագիտության խոսք ուղղեց ցեղասպանության ինստիտուտի և թանգարանի տնօրեն Հայկ Դեմոյանին՝ տրամադրած ցուցանմուշների համար, որը Երևանից բերել էր հիմնադրամի փոխնախագահ Ինգա Աղեկյանը: Նա իր խոսքում կարևորեց նման միջոցառումներով ցեղասպանության հարցը պահանջատիրոջ իրավունքով սերունդներին փոխանցելու անհրաժեշտությունը և խոսքն ավարտեց Հովհաննես Շիրազի «Հայոց դանթեականը» պոեմից հատվածի ընթերցմամբ:

Հայոց ցեղասպանության թեմայով ելույթներ ունեցան լրագրող Վալերի Հունանյանցը, պատմաբաններ Ենոք Թադևոսյանը և Նորայր Բաղդասարյանը: Հայոց մեծ Եղեռնին ձոնված սեփական բանաստեղծությունները ընթերցեցին բանաստեղծներ Անահիտ Բոստանջյանը և Մարինա Մոսեսովա-Կիրակոզովան և ուրիշներ: