Ապրիլի մեկին Վիրահայոց թեմի «Հայարտուն» կենտրոնի ցուցասրահում բացվեց թբիլիսահայ ճանաչված նկարիչ Գարեգին Միրզոևի աշխատանքների անհատական ցուցահանդեսը, որը կազմակերպել էր Վրաստանի հայ նկարիչների միությունը «Հայարտուն» կենտրոնի աջակցությամբ: Ցուցահանդեսին ներկայացված էին շնորհաշատ արվեստագետի յուղաներկ, խեցեգործական և խճանկարչական աշխատանքները: Ցուցահանդեսը բացեց Վիրահայոց թեմի մշակույթի բաժնի տնօրեն,«Հայարտուն» կենտրոնի համակարգող Լևոն Չիդիլյանը: Նա Խորհրդային Միության նկարիչների միության անդամ Գարեգին Միրզոևին շնորհավորեց Թբիլիսիում երկրորդ անհատական ցուցահանդեսի կապակցությամբ:

Վրաստանի հայ նկարիչների միության նախագահ Մերուժան Շահումյանը, ներկայացնելով Գարեգին Միրզոևի ստեղծագործական ուղին, նրա գեղանկարչությունը, խեցեգործությունը, քանդակագործությունը և խճանկարչությունը միատեսակ բարձրարժեք անվանեց, թերևս ընդգծեց, որ հեղինակի անսահման համեստության պատճառով դրանք ոչ միշտ են տեսանելի եղել հանրության համար:

Վրաստանի արվեստի վաստակավոր գործիչ Ռոման Սուխիշվիլին, անդրադարձ կատարելով Միրզոև արվեստագետների ընտանիքին, խոսեց ճանաչված գծանկարիչ Գրիգորի մասին, ում ձեռքի տակ աճել է այսօր արդեն ճերմակահեր Գարեգին արվեստագետը: Ելույթ ունեցողները արժևորեցին գույների, չափի ու ձևի հիանալի ներդաշնակությամբ ստեղծված նրա բնանկարները, նատյուրմորտները, խեցեգործության ու խճանկարչության նմուշները:

Հավարտ միջոցառման Տեր Մանուկ քահանա Զեյնալյանը փոխանցեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությունը և բարեմաղթանքները Գարեգին Միրզոևին՝ նրա ստեղծագործական աշխարհը ի ցույց հասարակության ներկայացնելու կապակցությամբ:

Վաստակաշատ և բազմակողմանի տաղանդով օժտված ստեղծագործողը արժևորեց գեղանկարչության թբիլիսյան դպրոցի ազդեցությունը իր արվեստի վրա: Նա երախտագիտությունը հայտնեց Վիրահայոց թեմի «Հայարտուն» կենտրոնին և Վրաստանի հայ նկարիչների միությանը իր գործունեությունը բարձր գնահատելու համար:

Ցուցահանդեսը կշարունակվի մինչև ապրիլի 10-ը: