|
2018 թվականի դեկտեմբերի 16-ին, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հանդիսապետությամբ, Բաթումի Սուրբ Փրկիչ եկեղեցում կիրակնօրյա Սուրբ և Անմահ Պատարագին ներկա էին Բաթումիում ՀՀ գլխավոր հյուպատոս Եղիշե Սարգսյանը՝ տիկնոջ հետ, Ջինիշյան հիմնադրամի ներկայացուցիչները, թեմակալ առաջնորդին ուղեկցող պատվիրակության անդամները:
Հընթացս Սբ. Պատարագի Տեր Վազգեն եպիսկոպոսը հավուր պատշաճի քարոզ խոսեց օրվա խորհրդի մասին, կարևորեց հավատացյալների մասնակցությունը Հայոց Եկեղեցու ծիսական արարողություններին: Սրբազանը օրհնեց եկեղեցուն նվիրած նկարները, որպես սրբապատկերներ զարդարելու են Սուրբ Փրկիչ եկեղեցին:
Հավարտ Սբ. Պատարագի, հյուրերը տեղափոխվեցին Վիրահայոց թեմի Բաթումի Ալ. Մանթաշյանց կենտրոն՝ մասնակցելու ՀՀ մշակույթի վաստակավոր գործիչ, պրոֆեսոր,գեղանկարիչ Սուսաննա Մկրտչյանի անհատական ցուցահանդեսի բացմանը:
Լայնահուն ներկապնակով ճանաչված նկարչուհին գործվածքի վրա կատարած մանրանկարչությամբ, ներկայացրել էր Աստծու որդու կյանքը՝ նրա ծննդյան ավետիսից մինչև Երկինք համարձումը, ինչը եղել է նաև Սուսաննա Մկրտչյան քրիստոնյայի մեծ Պահքը: Թբիլիսիում, Ախալքալաքում, Նինոծմինդայում ցուցադրվելուց հետո սույն ցուցահանդեսի հանգրվանը այս անգամ ծովափնյա այս քաղաքն էր:
Ցուցահանդեսը բացեց Աջարիայի, Գուրիայի, Իմերեթիի հայության և Բաթումիի Սբ. Փրկիչ եկեղեցու հոգևոր հովիվ Տեր Արարատ քհն. Գումբալյանը, արժևորեց ճանաչված նկարչուհու արվեստին բաթումահայությանը նույնպես հաղորդակից դարձնելու նպատակը:
Յուրահատուկ մտահղացմամբ արվեստի այս գործերի մասին խոսք ասացին հյուպատոս Եղիշե Սարգսյանը, Ջինիշյան հիմնադրամի Երևանի գրասենյակի գործադիր տնօրեն Արմեն Հակոբյանը:
Վերջում շնորհաշատ արվեստագետը երախտագիտություն հայտնեց Վիրահայոց թեմի առաջնորդին՝ իր աշխատանքները թեմի տարբեր քաղաքներում ցուցադրելուն աջակցության համար:
Ցուցահանդեսը օրհնության և գնահատանքի խոսքով ամփոփեց թեմակալ առաջնորդը: Վազգեն Սրբազան արժևորեց Սուսաննա Մկրտչյանի գործունեությունը ,ով ոչ միայն ստեղծում է արվեստի գործեր, այլև արդեն 4 տասնամյակ կրթում և գեղագիտական դաստիարակություն է տալիս աճող սերնդին, սովորեցնում նրանց արվեստի և արհեստի տարբեր տեսակներ: Թեմակալ առաջնորդը հայտարարեց, որ ցուցահանդեսը նվիրվում է Ամանորի և Սուրբ Ծննդի տոներին:
Այս ցուցահանդեսով ավարտվեցին Վազգեն Սրբազանի երկօրյա առաջնորդական այցը Աջարիա, հանդիպումները տեղի հայ համայնքների հետ:
|
