|
 2018 թվականի նոյեմբերի 14-ին Վիրահայոց թեմի Սբ. Մովսես Խորենացի նախակրթարանի (կրթության բաժնի տնօրեն Եվգենյա Մարկոսյան) բաց դասն էր «Աշուն» թեմայով: Դասարանում ուրախ, խայտաբղետ աշնանային մթնոլորտ էր տիրում:Աշունն իր գույներով, բերք ու բարիքով եկել հաստատվել էր այստեղ: Զգացվում էր, որ նախակրթարանի ուսուցիչները, ծնողների աջակցությամբ, երեխաներին տեսանելի էին դարձրել տարվա այս եղանակին բնորոշ բազմաբղետությունը. տերևաթափ ծառերը, մրգերի ու բանջարեղենի առատությունը:
Դասաժամը բազմամարդ էր. ներկա էին Սբ. Գևորգ առաջնորդանիստ և Հավլաբարի Սբ. Էջմիածին եկեղեցիների հոգևոր դասը, Թեմի աշխատակիցները, ծնողներ, հյուրեր: Թեև սա նախակրթարանի այս ուստարվա անդրանիկ միջոցառումն էր, բայց դա չկաշկանդեց սաներին: Դասվար Անի Զեյնալյանը սովորականի նման սկսեց դասը՝ հարցեր ուղղելով երեխաներին: Իսկ նրանք անբռնազբոս, իրենց հատուկ համարձակությամբ, ճիշտ և հստակ պատասխանում էին, ցույց տալով, որ չնայած տարիքով փոքր են, բայց արդեն շատ բան գիտեն և կարող են գոհացնել ներկաներին: Ուրախ դասին մասնակից դարձան նաև ծնողները, պատասխանելով երեխաների կողմից մեծերին առաջադրված հանելուկներին:
Արտասանություններով, հանելուկներով, երգերով հագեցած բաց դասի գեղեցիկ ավարտ դարձավ չուրչխելաների (քաղցր սուջուխ) պատրաստումը երեխաների ձեռքով, ինչը դասասենյակում ստեղծեց մեծ աշխուժություն և ուրախ տրամադրություն:
Միջոցառումն օրհնության խոսքով ամփոփեց արժանապատիվ Տեր Տաթև քահանա Մարուքյանը: Վերջինս բարձր գնահատեց մանկապարտեզի ուսուցչուհիներ Անի Զեյնալյանի, Մետաքսյա Ղազարյանի, Լիա Խիփարիշվիլիի նվիրական աշխատանքը, նաև երախտագիտության խոսքեր ուղղեց ծնողներին, ովքեր իրենց երեխաներին բերում են հայեցի դաստիարակության այս նախակրթարանը:
Միջոցառումն ավարտվեց երեխաների կողմից ասված Տերունական աղոթքով:
|
