|
Լուրեր
|
|
2018 թվականի նոյեմբերի 11-ին, կիրակնօրյա Սուրբ Պատարագի վերջում, Վիրահայոց թեմի գործող եկեղեցիներում հոգևոր հայրերի նախագահությամբ, հոգևոր դասի և սարկավագաց խմբի մասնակցությամբ տեղի ունեցավ հոգեհանգստյան արարողություն՝ ի հիշատակ լեգենդար մարզիկ, Վրաստանում Հայաստանի Հանրապետության նախկին դեսպան Յուրի Վարդանյանի և ավտովթարի զոհ դարձած Հայոց բանակի 4 զինծառայողների հոգու խաղաղության համար:
Հավարտ Սբ. Պատարագի, Թբիլիսիի Սուրբ Գևորգ առաջնորդանիստ եկեղեցում Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը ցավակցության խոսքեր ուղղեց հայրենիքի զինվորների անսպասելի կորստյան և արժանավոր հայորդի Յուրի Վարդանյանի մահվան կապակցությամբ, մխիթարության խոսքեր ուղղեց նրանց ծնողներին և հարազատներին և հավատացյալներին հորդորեց միասնաբար աղոթել ի հիշատակ ազգի զավակների հոգիների:
Թեմակալ առաջնորդի նախագահությամբ կատարվեց հոգեհանգստյան պաշտոն: Ներկաները մոմեր վառելով և խնկաբույր տարածելով աղոթեցին զոհվածների հոգու հանգստության խաղաղության համար:
Յիշատակն արդարոց օրհնութեամբ եղիցի: Ամէն:
|
