| Դսեղցիների այցելությունը Թբիլիսիի Հովհաննես Թումանյանի տուն |
 |
 |
 |
| Լուրեր |
|
Ամենայն հայոց բանաստեղծի թբիլիսյան տանը այժմ գործում է «Հովհաննես Թումանյանի տուն» գիտա-մշակութային կենտրոնը: Շրջայց կատարելով նորոգված սենյակներում, այցելուները հիացմունքով նշեցին թումանյանական այն մթնոլորտը, որ թևածում է կենտրոնում, ստեղծելով լուսահոգի բանաստեղծի կենդանի շունչը: Կենտրոնի ղեկավար Գիսանե Հովսեփյանը, փոխանցելով Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզխանյանի ողջույնը և օրհնությունը, հյուրերին ներկայացրեց տան ձեռքբերման, վերանորոգման պատմությունը, երախտագիտությամբ արժևորելով իշխանական կառույցների և արժանավոր հայորդիների ներդրումը Մեծ Լոռեցու բնակավայրը հոգևոր թեմին վերադարձնելու գործում:Կենտրոնի ղեկավարը խոսեց նաև կենտրոնի ներկա գործունեության ուղղությունների մասին: Դսեղ գյուղի Հովհաննես Թումանյանի տուն-թանգարանի տնօրեն Ռոզա Ղազումյանը կենտրոնի գրադարանին նվիրեց Սուսաննա Հովհաննիսյանի «Հովհաննես Թումանյանի կյանքը և գործունեությունը» գիրքը, Երևանի Հյոււսիսային համալսարանի հրատարակած «Թումանյանը և 21-րդ դարը» գիտական նյութերի ժողովածուն: Հյուրերը դիտեցին տիկնիկային թատրոնի հիմնադիր Արմեն Հովհաննիսյանի բեմադրությամբ «Շունն ու կատուն» ներկայացումը: Դսեղցիների համար անչափ հուզիչ էր գտնվել այն պատշգամբում, որտեղ սիրում էր հանգստանալ բանաստեղծը, մտովի ոգեշնչվեր գրելու իր անմահ գործերը: Տիկնիկագործ Արմեն Հովհաննիսյանը ներկաներին պատմեց մի շարք դրվագներ Թումանյանի հուշերից դսեղցիների մասին, ստեղծելով նրանց ուրախ տրամադրությունը: Հյուրերը Թումանյանի տան գրադարանը զարդարեցին Դսեղից բերած մանուշակների փնջով, ներկաներին հյուրասիրեցին բանաստեղծի ծննդավայրի բույն ու համը ունեցող հայկական գաթայով: Դսեղից ժամանած հյուրերը այցելեցին նաև Խոջիվանքի Մեծաց մեծերի պանթեոն և ծաղիկներ խոնարհեցին Անմահ Լոռեցու գերեզմանին ու նրա կողքին հանգչող մեծերի շիրիմներին: Դսեղցիների այցելությունը, որը իրենք անվանեցին ուխտագնացություն, ավարտվեց Սուրբ Գևորգ առաջնորդանիստ եկեղեցում, որտեղ մոմեր վառեցին և աղոթք արեցին հինավուրց տաճարում ու ծաղիկներ խոնարհեցին անմահ Սայաթ-Նովայի գերեզմանին:     |
