Մեծ շուքով նշվեց Սուրբ Ծննդյան տոնը Վիրահայոց թեմի Ռուսթավի քաղաքի Սուրբ Գրիգոր Նարեկացի հոգևոր, կրթա-մշակութային և երիտասարդության կենտրոնում:

2018 թվականի հունվարի 21-ին կենտրոնում հավաքվել էին տեղի նորաստեղծ հայ համայնքի անդամները և հարակից շրջաններից ժամանած հյուրեր, իրենց մասնակցությունն էին բերել Վրաստանում ՀՀ դեսպանության դիվանագետները, «Վրաստան» թերթի խմբագիրը, Թեմի պաշտոնյաները և Թբիլիսիից ժամանած երիտասարդները: Միջոցառմանը ներկա գտնվելու նպատակով Հայաստանից ժամանել էին Նաթելա և Արկադի Ղասաբյան ամուսինները, որոնք դարձել են կենտրոնի բարեկամները, ցուցաբերելով աջակցություն կենտրոնի գործունեությանը:

Տոնահանդեսն իր ներկայությամբ պատվել էր Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

Միջոցառումը ողջույնի խոսքով բացեց Վիրահայոց թեմի Ռուսթավիի և Մառնեուլի շրջանի հայության հոգևոր հովիվ Տեր Նարեկ քահանա Ղուշչյանը:

Կենտրոնը հավուր պատշաճի էր պատրաստվել միջոցառմանը, ներկաների առջև ցուցադրելով Հիսուս Քրիստոսի ծննդյան ասես իրական պատկերը, որտեղ կենտրոնի սաները ներկայացրեցին Սուրբ Ծնունդն իր խորհուրդներով, տոնական ավանդույթներով և բարի խրատներով: Միջոցառումը թե՝ գեղարվեստական ձևավորման, թե մատուցման տեսակետից բարձրարժեք էր, բովանդակալից և հագեցած:

Նկատելի էր այն մեծ աշխատանքը, որ տարվել էր ուսուցիչների կողմից՝ մասնակիցների խոսքը գեղեցիկ և անսխալ հայերենով մատուցելու համար, ինչը ընդգծում էր սովորողների հետաքրքրությունը և հարգանքը մայրենի լեզվի նկատմամբ:

Միջոցառումը ուղեկցվեց նաև գեղարվեստական համարներով. երգ, պար, դուդուկի նվագ, ասմունք, դառնալով կենտրոնի սովորողների մի քանի ամսվա ընթացքում ձեռքբերումների ցուցադրություն:

Հավարտ հանդեսի իրենց տպավորությունները արտահայտեցին Վրաստանում ՀՀ հյուպատոս Էլինա Մկրտչյանը, դեսպանության առաջին քարտուղար Արթուր Սարգսյանը, մամլո խոսնակ Հարություն Հայրապետյանը, «Վրաստան» թերթի խմբագիր Վան Բայբուրթյանը, Վիրահայոց թեմի մամլո խոսնակ Սուսաննա Խաչատրյանը: Նրանք միանշանակ արժևորեցին այն առաջընթացը, որին հասել է Ռուսթավի քաղաքի Սուրբ Գրիգոր Նարեկացի հոգևոր, կրթա-մշակութային և երիտասարդական կենտրոնն իր գոյության կարճ ժամանակաընթացքում: Հնչեց նաև Վրաստանում ՀՀ դեսպանության պատրաստակամությունը կենտրոնի գործունեությանը աջակցելու մասին:

Վերջում ամփոփիչ խոսքով հանդես եկավ Վիրահայոց թեմի առաջնորդը: Գերաշնորհ Տեր Վազգեն եպիսկոպոսը փոխանցեց Ն.Ս.Օ.Տ.Տ. Գարեգին Բ Հայրապետի օրհնությունը Ռուսթավի հայ համայնքի անդամներին: Գնահատանքի իր խոսքում Թեմակալ առաջնորդը քաջալերեց կենտրոնի շուրջ համախմբված սաներին՝ մայրենի լեզուն, ազգային մշակույթը սովորելու և հոգևոր դաստիարակություն ստանալու գործում դրսևորած ակտիվության համար: Վազգեն Սրբազանը արժևորեց նաև ծնողներին և ուսուցիչներին, ովքեր Տեր Նարեկ քահանայի գլխավորությամբ, ջանք ու եռանդ չեն խնայում կենտրոնի սաներին Եկեղեցու պատվիրաններով և ազգային ոգով դաստիարակելու գործում:

Միջոցառումը դարձավ այն բանի վկայությունը, որ Հայոց Եկեղեցու առաքելությունը Ռուսթավի քաղաքում, հանձինս Սուրբ Գրիգոր Նարեկացի կենտրոնի, ընթանում է ճիշտ ուղղությամբ, արդարացնելով իր նպատակը: